uMthunywa
Nkosilathi Sibanda
BAVUKE upekenyane abakhokheli bamaqembu enguqu kuligi yeZifa kumhlubulo ongezansi yelizwe, balwisana lobukhokheli buka-Andrew “Squad” Tapela.
Kwehle iyezi elimnyama kuTapela ngoMvulo lapho amaqembu avumelane ukuthi akhitshwe esikhundleni sokuba ngumgcinisihlalo weligi le.
Isisusa sokukhitshwa sivela ekuthini amaqembu abike ukuba awasuthiseki ngombuso wakhe ngakho angeke ambuyisele esikhundleni ngesizini ezayo. UTapela wavotelwa ngomnyaka ka-2018, ekutula uMusa Mandaza.
Ngokomthetho, umbuso kaTapela waphela ngenyanga kaMfumfu. Kulandela ukungasuthiseki kwamaqembu, kube ngumbono wenengi ukuthi kahle athathe umhlalaphansi.
Kumhlangano oqhutshelwe emawofisini eZifa koBulawayo, amaqembu angu-12 avumelane ukuthi akuphele ngoTapela. Iligi ilamaqembu angu-17
Ezinye inkokheli ezikhitshiweyo nguGaylord Madhunguza loMehluli Thebe obengunobhala.
Zifa
Umgciningcebo uTizirayi Luphahla uxolelwe. Iphephandaba likazulu belikhona kulumhlangano lapho okuvele khona ukuthi kunengi okuxabanisa amaqembu loTapela.
Ngokuphenyisisa kwentatheli, kubikwa uTapela ubebusa ngodli njalo amaqembu asole indlela aphathe ngayo inhlanganiso, ngaphezulu kwalokhu ube ngahlanganeli labanye kumihlangano yeZifa.
“Asikwazi ukuthi umi ngaphi,” kutsho enye inkokheli eyesabe ukuqanjwa, ikhuluma ngesizatho sokususwa kukaTapela.
“Sabhadala imali yokudlala lokuba yingxenye yeZifa kodwa simangaliswa yikuthi inkokheli lezi zazingafuni ukuphatheka emhlanganweni yeZifa. Kufana lokuthi imidlalo yethu yayingekho emthethweni nxa knjalo.”
Amaqembu akhala njalo ngokusetshenziswa kwemali yeCovid-19 okwakumele iphathise ngesikhathi inguqu imiswe yilumkhuhlane.
Kubikwa ukuba zonke izithembiso ezenziwa nguTapela labanye zaphenduka ize, nanko akulanguquko eyabakhona kusukela bengena ezikhundleni.
“Umbono wamaqembu yikuthi inkokheli bezilenkinga ezingaphathelananga lebhola nanko zakubeka kwacaca ukuthi azihloniphi inkokheli zeZifa,” kutsho uKhumbulani Mbano`okhulume emele amaqembu.
Ekhuluma lentatheli, uTapela uthe udaba lwakhe uluzwa ngelikabathi.
“Ngizakhuluma nxa ngithola incwadi engazisa ukuthi sengikhitshiwe.”
Mhla engena esikhundleni ngo-2018, uTapela watshela intatheli zephaphandaba likazulu ukuthi uhlose ukuqinisa amaqembu ngokwenza amakilasi ezemfundo ukuze inguqu ikhokhelwe ngobungcitshi.
“Sizancedisa amaqembu ngokwenza ama-course njalo sizakuba lamaqhinga okuvuselela inguqu yethu.
“Ubukhokheli obuhle yilobo obubatshazwa ngumuntu wonke. Angithi nxa ukhokhela inhlanganiso kumele wazi ukuthi ukuphumelela kwayo yikusebenzelana labantu kuhle. Yikho esizakwenza,” nguTapela lo ngo-2018.
Umbuso kaTapela waphanjaniswa yikuqhamuka kweCovid-19. Amaphupho ayelawo atshabalala, inguqu ayidlalwanga okweminyaka emibili.
