uMthunywa
Msilisi Dube
NGENXA yokungafuni ukwaliwa kulendoda yeZvishavane ethukuthele yathela itshamali yayo nge acid yafa, uMthunywa ukuzwile lokhu.
Umsolwa odabuka esiqintini seMangera, eZvishavane uRonald Zhou (31), kubikwa uthele itshamali yakhe uTendai Kurehwatire oleminyaka engu-22 nge-acid wafa ngomnyaka ophelileyo ngenxa yokuba esemalile.
Indaba le ivele emthethwandaba weZvishavane emavikini amabili adluleyo lapho umsolwa abesetheswa icala lokubulala.
Inkundla le izwe ukuba ngomnyaka ophelileyo ngenyanga kaMabasa umuyi watshela umsolwa ukuba wayesethole enye indoda engcono kulaye ngakho wayengasamfuni.
Kuzwakale ukuthi lokhu akuzange kumphathe kuhle umsolwa owaqhubeka ezama ukubamba ngamandla lo osengumuyi ukuthi baqhubeke bethandana.
Kubikwa umuyi wacina esebaleka wayacatsha kwesinye isigaba kodwa umsolwa wamlandela.
Kuzwakale ukuthi umsolwa wafika lapho ayehlala khona ethwele igabha elingange- 500ml ligcwele i-acid.
Kubikwa umsolwa waqunga umuyi nge acid watsha umzimba wonke andubana adliwe ngumswenya.
Umuyi wagijinyiselwa esibhedlela seZvishavane lapho afika wabhubhela khona.
Amapholisa achwayisisa ngokufa kukamuyi ngakho kwasokuvela ukuba umuyi wayelesandla kulesisenzo.
Umsolwa ubotshwe kuyonale inyanga ngemva kokubonakala ebhodabhoda esigabeni lesi. Umantshi uMnumzana Story Kusheumbwa kazange abuze umsolwa ukuthi uyalivuma kumbe uyalilandula icala lakhe kodwa umvalele esitokisini.
Umsolwa uzabuye athonisiswe ngesenzo sakhe mhlaka 2 Ntulikazi.
