uMthunywa
Joel Ndlovu
ABALIMI bemibhida bakhuthazwa ukuba baqale ngokuthela umquba ezivandeni zabo ngaphambi kokuba balime imibhida yabo.
Ekhuluma lentatheli kaMthunywa uNkosikazi Agnes Ndebele oyingcitshi kwezokulima esabelweni seMatabeleland North uthe izikhathi ezinengi okwenza imibhida ingakhuli kuhle yikuthi abantu bayabe belime nje emhlabathini ongelakudla.
“Okwenza uthole imibhida ingakhuli ngendlela yikuthi uyathola umuntu ehlanyele emhlabathini owome qha engelakho ukudla futhi.
“Umquba akusiyonto edulayo ngoba uthatha owenkomo, owenkukhu kanye lotshani obomileyo konke, nje kwenza umquba omuhle kakhulu uzifakele esivandeni.
“Ngakho-ke imibhida yakho iba mihle kakhulu lamahlamvu akhona aba makhulu,” kutsho uNkkz Ndebele.
Uqhubekele phambili esithi abalimi abanengi bayathi nxa sebefake lowo mquba balima imibhida yabo bakhohlwe lokuwuthelela bengazi ukuthi imibhida elomquba ifuna amanzi amanengi.
“Umlimi angathi esefakile umquba akumelanga akhohlwe ukuthelela, lokhu kwenza ingakhuli futhi ngoba imibhida elomquba ifuna amanzi amanengi ukuze ikhule kuhle.
“Imibhida elomquba ingaswela amanzi eneleyo iyaphangisa ukubuna ngakho amanzi amanengi ayadingeka,” kulandisa uNkkz Ndebele.
Uphethe ngokuthi imibhida iyisitshebo esihle njalo esithi singalinywa kuhle siba lenzuzo enhle kumlimi.
“Imibhida siyidla nsukuzonke lokhu kutshengisa ukuthi umkambo wemibhida ubanzi kakhulu ngakho labalimi badinga ukuthi bawuhlakaniphele lowo mkambo njalo bawenze ngendlela elenzuzo phakathi.
