uMthunywa
Johas Moyo
KUSEHLAKALO okunathiswana ngaso itiye esigabeni seChipale eBinga, kulenye indoda ebisilesikhathi eside igula evuke yathi kwatshu ngemva kokukhitshwa kwenyoka encinyane ku-wardrobe ephenduke yaba yinhlathu egcwale isaka ngempelaviki.
Kucatshangelwa ukuba inhlathu le ibithunywe ngumakhelwane ukuzombulala njalo abaphurofethi abayikhiphileyo bahambe layo.
UMthunywa uzwe ukuba inyoka le ekhitshwe ngabaphurofethi yiyo ebibangela ukugula kukaMnumzana Samuel Ncube wesiqintini sikasobhuku uSianoti ngaphansi kwenduna uSinamangonde njalo ibithunywe ngumakhelwane wakhe.
Kubikwa ababelapho ngalelolanga lokhu bebambe owangaphansi ngesiga lesi.
Elinye ilunga lemuli le elikhulume loMthunywa uMnumzana Peace Ncube uthe umfowabo ubeselesikhathi eside egula njalo umkhuhlane ubusumqinela okwenze bacina bebiza indodana yakhe ehlala eGoli eyiyo ebuye labaphurofethi labo.
“Umntanomnewethu uButho Ncube nguye obuye labaphurofethi evela eGoli njalo yibo abasize umnewethu.
“Umnewethu ubengasavuki kodwa konela ukukhitshwa inyoka wahle wavuka wathi khwatshu lalamuhla lokhu sitshe amathe,” kulandisa uPeace.
Uqhubekele phambili elandisa ukuthi wabona umkhuhlane uqina wasesazisa indodana yomnewabo.
“Umnewethu umkhuhlane ubungasehli kungakho ngabona kungcono ukuthi ngibize indodana yakhe okuyiyo ebuye labaphurofethi abakhuphe inyoka le.
“Okube yisimanga yikuthi inyoka le ibincane kodwa ikhule isikhutshiwe phandle kwendlu ngemva kwesikhathi esincane,” kuchasisa uPeace.
Uthe abaphurofethi laba bathi bekhuleka bachaza ukuba kulento ku-wardrobe kodwa abazange bakuzwisise njengemuli ukuthi yinto bani andubana bachaze ukuthi kulenyoka eku-coat hanger abathi sebethandazile bayibamba yaqalisa ukukhula yaze yagcwala isaka.
“Umphurofethi omkhulu wasitshela wathi kulento ku-wardrobe ngemva kokukhuleka andubana ayikhiphe sonke sayibona ngamehlo kuyinyoka encinyane nje.
“Isimanga yikuthi inyoka le yaluma umphurofethi waqaleka okwesikhathi eside njalo yona yayizama ukubaleka kodwa bayikhulela abantu besonto,” kulandisa uPeace.
UPeace uthe umphurofethi lo wathi inyoka le yathunywa ngumakhelwane ukuzobulala umnewabo. Inyoka leyo umphurofethi uhambe layo ngoba ebike ukuthi ngekamakhelwane kungenzeka ukuthi aphinde abalibhe futhi ngayo ingatshiswa kuleyondawo.
UMthunywa kenelisanga ukuxhumana loSamuel onguye owayegula ngoba umakhalekhukhwini wakhe ubengangeni.
