uMthunywa
Ethel Ncube
KULEMULI yeHabane eSigodini eyethuse izakhamizi zakule indawo ngemva kokuveza ukuthi ibigcine inyoka ebitshontsha imali lokudla ezitolo zakuleyo ndawo, uMthunywa uyakuveza lokhu lamhlanje.
Isiga lesi sivele ngoLwesibili ebusuku kuviki ephelileyo lapho obekulomlindelo wamaZiyoni emzini wakoMoyo.
UMthunywa uzwe ukuba imuli le yatshiyelwa inyoka le ngabazali bayo ukuze iyisebenzise ukuthola inotho.
Iphephandaba likazulu likhulumisane lesinye isakhamuzi esasikhona inyoka le ikhitshwa uNkosazana Bongiwe Dube ochaze ukuthi bazibonela ngawabo amehlo isimanga lesi.
“Kwakukhulekwa kwathutsha inhlathu ihuba egumeni ivelela ezitolo zeHabane ithwele i2kg yerayisi uhlobo lwe-Capri.
“Ngilapha angilankani ukuthi ukudla obekudliwa koMoyo bekulethwa ngumhambaphansi. Abantu ababesemlindelweni babikelwa ukuthi abakoMoyo bayazi mhlophe inyoka le yikho nje bebabizile ngoba isibahlupha,” kulandisa uNkszn Dube.
Intatheli ibuye yakhulumisana lesinye isakhamuzi uMnumzana Dingindlela Sibanda oveze ukuthi kulenyoka eyathutsha koMoyo ivela ezitolo ithwele isisitheka lephakethe lerayisi.
“Inyoka yaphuma akula ongayibonanga kwababekhona enkonzweni. Bakubeka sobala ukuthi bebeyisebenzisa kodwa ke khathesi ibisitshontshela bona yikho nje sebesizwa ubuhlungu.
“Okwenze bayikhipha yikuthi ibisihlupha ekhaya bengasalali ilala ihwabha ifuna ukubulala omunye wabo.
“Osomabhizimusi ibibathwalise amagabha avuzayo ngoba ibitshontsha imali ngitsho lokudla ngokwakho njengoba ibithutha ebusuku,” kulandisa uMnu Sibanda.
Kuzwakale njalo ukuthi inyoka le ibisibaxabanisa njalo ibisibatshontshela imali abayisebenzayo. Uqhubekele phambili echaza ukuthi bebekhomba ngophakathi koMoyo bengasweli lutho.
“Kambe bebesidlani ebabayo ngenhlathu le ebisebenza ingadlali ikakhulu ebusuku ibisiyangena izitolo zivaliwe ithathe yikho nje ize yathutsha ithwele irayisi ngomlomo.
“Yathutsha ingadlanga nkotshana iqonde endlini ehlala ukudla yaphuma isilolaka ifuna ukuluma abantu abaphurofethi bayithela ngamanzi omthandazo bayibulala yatshiswa.
UMthunywa ukhulume lelinye ilunga lemuli uMnumzana Shadreck Ndlovu obike ukuthi kalamazwi angawatsho kuntatheli.
“Mina ngingumzukulu lapha ekhaya umuzi ngokamalume lami bengibiziwe ukuthi ngizobona yona, nguye okumele azikhulumele emzini wakhe njalo amanye amalunga emuli awasekho engxenye sikhulume bona bengathandi.
Libobuya nxa izinto zikhitshwa lizibonele.
“Okwakhathesi asilasikhulumi semuli okumele siphendule imibuzo ebuzwayo. Lokhu obekusenziwa lapha ekhaya akuqondananga labanye abantu ngokwemuli, akulani labamaphephandaba,” kutsho uMnu Ndlovu.
Ekhuluma lentatheli lowo ocatshangelwa ukuthi inyoka le ibiletha ukudla lemali emzini wakhe uMnumzana Moyo owale ukuveza igama lakhe uveze ukuthi kalamazwi.
“Mina angilakho engingakutsho kuwe angikhulumi lentatheli mina,” kuphetha uMnu Moyo.
