uMthunywa
Johas Moyo
KUSIGA esitshiye enye imuli yeLuveve edolobheni lakoBulawayo itshe amathe kulandela umbango wendlu nanko phela kubikwa kuvele incwadi ithonisa isikwelede somufi sika1991, uMthunywa uyakuveza lokhu lamhlanje ngokugcweleyo.
Isimanga ngencwadi le yikuthi siveza ukuba umufi uWitness Mazinyane owabhubha ngomnyaka ka1991 ulesikwelede se-$500 000 somunye umlungu oselizweni leSouth Africa okwenza amalunga emuli le acabangele ukuthi ngabantu abafuna ukuthatha indlu le.
Incwadi le kubikwa ifike kuviki ephelileyo njalo kukhanya yabhalwa mhlaka 22 Nhlolanja 2016 njalo ilesidindo selanga leli.
UMthunywa uzwe ukuthi indlu elenombolo ezithi 5947 Luveve 5 esebizweni likaCelani Mazinyane yena owakhetha ukupha uyisekazi uNkosazana Mirriam Mazinyane indlu le ngoba yena endile.
UMthunywa wenelise ukuxoxisana loNkszn Mazinyane oveze ukuthi isikwelede esikhulunywayo kasizwisisi ngoba umnewabo kudala wabhubha.
“Kulokudonselana ngendlu le ngoba umnewethu wathi ebhubha ngo1991 watshiya unkosikazi laye osowabhubhayo. Umnewethu lonkosikazi wakhe baba lomntwana oyedwa uCelani kodwa kulomntakamnewabo kankosikazi wakhe (uMaSithole) ofuna indlu le ngoba sike saya emthethwandaba ngoNhlangula nyakenye indlu yaphiwa uCelani owanika mina indlu.
“Indlu le abakibo kaMaSithole bake bayithatha bayenza eyabo yikho nje ngikholwa ukuthi lokhu yikho osekusenza samukele incwadi le engazwisisekiyo,” kutsho uNkszn Mazinyane.
Uqhubekele phambili wathi okumangalisayo yikuthi sekudlule iminyaka engu-25 isikwelede singathoniswa.
“Kungani umuntu lo ubengabuzi isikwelede sakhe iminyaka yonke le sokuze kwedlule iminyaka engu-25, ngoba umnewethu uWitness wabhubha ngomnyaka ka1991.
“Okwesibili kudala kwakungasetshenziswa ama US$ pho-ke lumuntu ukuthatha ngaphi ukuthi athi umnewethu osengumuyi ulesikwelede seUS$500 000. Lokhu kuveza sobala ukuthi kukhona okutshaya amanzi lapha,” kuchaza uMazinyane.
UMthunywa wenelise ukubona incwadi le okubhalwe ukuthi imali le kumele ifakwe ebhanga.
Ebuzwa ukuthi kungani ecabangela ukuthi umntakamnewabo kaMaSithole nguye olesandla kuncwadi le uthe nguye ohlala kweleSouth Africa.
“Umntakamnewabo kaMaSithole nguye zwi ongaphuma legqinga leli ngoba wayeyifuna indlu le njalo nguye ohlala elizweni leSouth Africa.
“Kodwa-ke ngeke bayithathe kabangibulale kuqala ukuthi bayithathe indlu yomnewethu. Sikhuluma sisenzenje lalamuhla lokhu abakoSithole bala ngitsho lencwadi yokufa yomnewethu,” kutsho uMazinyane.
Uqhubekele phambili uNkszn Mazinyane eveza njalo ukuthi indaba zezikwelede ezingazwisisekiyo zimthwalele ubhulo ngoba khathesi kulesinye esocingo asibhadalayo.
UMthunywa wenelise njalo ukukhuluma lomunye umakhelwane ongathandanga ukuqanjwa ngebizo oveze ukuthi indaba le kungenzeka kuyindlela yokuthatha indlu le.
“Kambe yisikwelede bani esithoniswa ngemva kweminyaka yonke le njalo singesomuntu osewabhubhayo,” kuchaza umakhelwane lo.
Imizamo yokukhulumisana loCelani Mazinyane okunguye umnikazi wendlu yehlule ngoba kubikwa uvakatshile phetsheya kwelizwe.
UMthunywa wenelise ukuxhumana lowathumela incwadi le oziveze ngokuthi nguAisha okhanya sengathi ngumlungu othe ebuzwa ngendaba le wavuma ukuthi uyabazi kodwa uthe esizwa ukuba intatheli itshaya ucingo iseZimbabwe waquma ucingo.
“Indaba le yimfihlo yemuli njalo ngeke ngikutshele lutho ngayo ngoba angikhulumi lutho labantu engingabaziyo,” andubana aqume ucingo.
Intatheli iphinde yazama ukutshaya ucingo lolu kodwa uAisha ebengasaludobhi ucingo lwakhe lanxa besekusetshenziswa inombolo zocingo ezitshiyeneyo.
