uMthunywa
Cornelius Luphahla
Inhlanganiso ye Zimbabwe Population-based HIV Impact Assessment (Zimphia) iqhubekela phambili ngohlelo lokuhamba ihlola igcikwane lengculazi ezindlini zabantu emadolobheni kanye lemaphandleni ngenhloso yokuvikela ukumemetheka kanye lokufundisa uzulu ngegcikwane leli.
Ekhuluma emkhosini lo uNkosikazi Fikile Marovatsanga obemele uMinister of State for Provincial Affairs koBulawayo uKhomuredi Nomthandazo Eunice Moyo ngoLwesine kuviki ephelileyo, ukhuthaze abantu bakoBulawayo ukuthi bamukele abezempilakahle abazabavakatshela abaqhuba uhlelo lokuhlola abaphila lengulazi.
Kubikwa inhlanganiso le izaqhubekela phambili ihlola abantu igcikwane lengculaza ezindlini zabo khonapha koBulawayo njalo ibafundisa ukuthi baziphathe njani nxa bengatholakala belalo loba bengelalo. Imfundiso le kubikwa izaqhutshwa ezindlini zabantu ngemva kokuvumelana labo.
Ekuhlolweni lapha abazatholakala ukuthi baphila legcikwane lengculazi kumbe i-syphilis kubikwa bazahlolwa lesilinganiso samasotsha omzimba wakhe (CD4 cell count) ukuba ayenelisa yini ukulwela umzimba kumbe adinga ukuvuswa. Nxa amasotsha la esedinga ukuvuswa umuntu lo uzabhalelwa incwadi yokuyathola usizo ekilinika ayifunayo.
“Kuqakathekile ukuthi abe-Zimphia nxa bevakatshela imizi yabantu abantu bavume ukuhlolwa ingculazi ukuze labo asebehlaselwe ngumkhuhlane lo bathole ukwelatshwa ngokuphangisa kuthi labo abangakahlaselwa bathole imfundiso mayelana lokuzivikela kulo umkhuhlane,” kutsho uNkkz Marobatsanga.
Uqhubekele phambili njalo wachaza ukuthi ulokujabula okukhulu ngoba uhlelo lweZimphia lwasungulwa kuleli.
“Ngiyajabula kakhulu ngoba uhlelo lweZimphia lwasungulwa kuleli njalo iZimbabwe itshengisa ukuqhuba kuhle kuloluhlelo ukwedlula amazwe wonke angu-20. Ngalokhu ngilethemba lokuthi abantu bazaqhubeka belwamukela kuhle uhlelo lolu ukuze luthuthuke ngamandala,” kuphetha uNkkz Marovatsanga.
