uMthunywa
Thokozile Mbedzi
I-Agritex isikhuthaze abalimi kundawana zonke zelizwe ukuba bavikele amazinyane emqandweni lo oseleyo.
Ekhuluma lentatheli kaMthunywa uProvincial Agritex officer uDumisani Nyoni uthe abalimi kabavikele amazinyane, amathole lamatsiyane kumqando.
“Abalimi kundawana zonke zelizwe kumele bavikele amathole, amatsiyane lamathole kumqando ngoba uyingozi. Abalimi kabakhele izibaya zabo kuhle ngendlela evikela amathole, amatshiyane, lamazinyane.
“Abanye balakho ukwakha izibaya zabo ngendlela evikela izifuyo lezi ngoba kuyabe sokusithekile ukuze zithole ukukhudumala ngesikhathi zizichelesele esibayeni.
ithole
“Kusiya ngokwehluka kokuzuza kwabalimi abanye baqonda ukwakha izindlu lapho abafaka khona izifuyo lezi ngesikhathi somqando ukuze zivikeleke ngoba abalimi bacina behlangana lokulahlekelwa yizifuyo zabo ngenxa yomqando,” utsho njalo.
Uthe abalimi balakho ukwenza amalima bencedisana ukwakha komunye lomunye ukuze bengabi lendleko ezinengi njalo lokusebenzelena ndawonye kwenza umsebenzi ube lula, abalimi bathole amathuba okwenza imisebenzi masinyane benelise ukugoqela imisebenzi le ngesikhathi esiqondileyo.
Kuyinto eqakathekileyo ukuba abalimi bavikele izifuyo lezi ngoba zisadinga ukunakekelwa kakhulu ukuze zikhule zilempilakahle enhle ukuze umlimi munye ngamunye engalahlekelwa yizifuyo zakhe acine engasala nzuzo kuzo.
amatsiyane
“Izifuyo nxa zilala endaweni eqondileyo njalo zikhudumala kuyaziphathisa ukuba zikhule masinyane umlimi athole inzuzo yakhe ngesikhathi esiqondileyo njalo izifuyo ezinakekelwayo zilethela umlimi inzuzo ephezulu umlimi abelakho ukwenelisa ukumelana lendleko ahlangana lazo ngoba ezathola intengo ephezulu.
“Abalimi kumele bananzelele njalo ukuba intengo ikhuphulwa ngendlela umlimi aphatha ngayo izifuyo lokuzinakela zivikelwa ngaso sonke isikhathi. Abalimi kumele bananzelele ngoba ukuvikela kuqakathekile izifuyo zingakaguliswa ngumqando,” kuphetha Provincial Agritex Officer Nyoni.
