uMthunywa
Johas Moyo
ABE-Veterinary Services sebekhuthaze abalimi besabelweni seMatabeland North ukuthi bavikele izifuyo zabo kumkhuhlane we-foot and mouth ovame ngasolesi isikhathi ngoba inkomo zisidla egangeni.
Kubikwa umkhuhlane lo ubangelwa ngamathe atshiywa zinyathi nxa zisidla utshani egangeni.
UDokotela Ndabezinhle Mkhwananzi okhangele isabelo seMatabeleland North ukhuthaze abalimi ukuthi baqaphelisise nxa bexotshela inkomo egangeni kumbe njalo nxa bezisusa kwenye indawo zisiya kwenye ngoba zilakho ukuhamba zithwele igcikwane lomkhuhlane lo.
“Inkomo nxa zithuthwa khathesi kumele ziqale zihlolwe ngabe-Veterinary ngoba igcikwane leli litholakala kunyamazana zeganga ezifana lenyathi njalo inkomo ezidla duzane le-game park kazihlale zivikelwa ukuze zingahlaselwa ngumkhuhlane lo.
“Abalimi kumele bafunde ukuthi i-foot and mouth ligcikwane elithelelwanayo eliyingozi ngoba liyazicakisa zehluleke ukudla njengoba lihlasela inyawo lomlomo.
“Inkomo ezilomkhuhlane lo ziyehluleka ukudla kanye lokuhamba kuthi amathole ahle afe ngokuphangisa ngoba ayabe engaselakudla esiswini,” kutsho uDkt Mkhwananzi.
UDkt Mkhwananzi uqhubekele phambili esithi inkomo ingahlaselwa ngumkhuhlane lo ibonakala ngokuvuvuka inyawo.
“Izifuyo ikakhulu inkomo ziyavuvuka inyawo zibe lamathuthuva lezilonda kuthi umlomo uyagcwala izilonda okwenza yehluleke ukudla kuhle kanye lokuhamba ngokunjalo abalimi kabahlale bezivikele izifuyo zabo,” kutsho uDkt Mkwananzi.
Kubikwa umkhuhlane lo uyathelelwana kungakho lapho okulezifuyo esezihlaselwe ngumkhuhlane lo kumele zihlatshwe umuthi wokuzivikela zonke kumango ongaba ngamakhilomitha alitshumi kusiya kumatshumi amabili.
“Nxa inkomo zingahlaselwa ngumkhuhlane we-foot and mouth kazivunyelwa ukuthuthwa okwenyanga ezintathu,” kutsho uDkt Mkhwananzi.
UDkt uMkhwananzi uqhubekele phambili ekhuthaza abalimi ukuthi kungabonakala inyathi eyeqileyo kumele babike emahofisini abo ukuze uHulumende avikele izifuyo zakuleyondawo ukuze zingahlaselwa ngumkhuhlane lo.
