uMthunywa
Thando Dube
ABANTU kweleZimbabwe sebecele ukuthi uHulumende kungatsha ezehlukeneyo abancedise ngolwazi lwamakhowa angabulaliyo.
Lesi isicelo sikazulu siza ngemva kokubana emavikini ambalwa adluleyo kulabantu abalitshumi lasithupha (16) eMberengwa kanye leFilabusi okubikwa bafe ngemva kokudla amakhowa la ayitshefu.
UMthunywa ukhulumisane labantu ezitaladeni zakoBulawayo abaveze ukuthi kungabalusizo ukuthi uHulumende ancedisane labalimisi kanye labezempilakahle ekufundiseni uzulu ngamakhowa adliwayo.
Ekhuluma loMthunywa uMnumzana Cacious Moyo uthe yena sokulemibiko etshiyeneyo lapho abezwa ngabantu abafa bebulawa ngamakhowa kukanti endulo bekuyisitshebo ebesidliwa nje abantu bekhululekile.
“Sicela ukuthi uHulumende wethu avakatshele emakhaya ehlukeneyo esebenzisana labalimisi kanye labezempilakahle ukuze abantu babelolwazi lokuthi yiwaphi amakhowa adliwayo langadliwayo,” kuchaza uMnu Moyo.
UMthunywa ukhulumisane loNkosikazi Sibusiso Dube oveze ukuthi uHulumende engafundisa abantu ngamakhowa kuzehlisa inani labantu abafa bebulawa ngamakhowa.
“UHulumende engancedisa abantu ikakhulu emaphandleni ngolwazi lwamakhowa kuzaba lusizo ngoba kuzehlisa inani labantu abafa bebulawa ngamakhowa,” kutsho uNkkz Dube
UMthunywa uphinde wakhulumisana lomlimi koBulawayo uIsaiah Motsi othe yena ibhizimusi yamakhowa iyehla ngodaba lokufa kwabantu bebulawa ngamakhowa.
“UHulumende engafundisa abantu ngamakhowa kuzabalusizo kithi lathi njengabalimi ngoba khathesi ibhizimusi yethu sisehla ngoba abantu abasathengi amakhowa besesaba ukuthi amakhowa la esiwathengisayo angababulala,” kuphetha uMnu Motsi.
