uMthunywa
LIHLEHLELE kumhlaka 11 Mpalakazi icala elibhekane lomethuli wezinhlelo zeGoli obuye abe ngumculi uMolemo Maarohanye, odume ngelikaJub Jub.
Izolo uJub Jub uvele enkantolo kamantshi weJohannesburg.
Abameli bakaJub Jub baveze ukuthi kukhona abantu abafuna ukuxhumana labo ukuze bathole ukuthi amacala abamsola ngawo umculi, enzeka kuphi futhi ngaziphi izikhathi.
Kubikwa ukuthi ubhekane lamacala athinta awokudlwengula, ukutshaya, lokuzama ukubulala.
Lawa macala wawavulelwa ngabesifazane ayesebudlelwaneni bezothando labo.
Okhulumela iNPA uNksz Phindile Mjonodwane uveze ukuthi ukuze babuye lalokhu okucelwe abameli bakamsolwa kumele baxhumane lobufakazi.
“Ukuze kwenzeke konke lokhu okuvele enkantolo, inkantolo iyalele umbuso kanjalo labammeli bakamsolwa ukuthi baqhubeke ngokuxhumana labathintekayo ecaleni, bese bebuya enkantolo ngoMpalakazi 11,” kuchaza uNksz Mjonodwane.
UJub Jub ubhekene lamacala angu-13 okubalwa awokudlwengula, ukutshaya, lokuzama ukubulala. Amanye amacala kuthiwa enzeka ngo-2006. Ungaphandle ngebheyili kaR10 000.
