uMthunywa
Cornelius Luphahla
SOKUVELE imbiko yokuba kulomculi kamaskandi odabuka eTsholotsho obezama ukuzibulala ngokunatha umuthi okucatshangelwa ukuthi ukwenze ngemva kokwaliwa linina akade ethandana lalo.
Indaba le iphumele egcekeni kunkundla yokuxhumana ye-Facebook ivezwa nguMagotsha ochaze ukuthi uMxolisi Nkomo odume ngokuthi nguZinjaziyamluma unathe umuthi wamagundwane ngoMgqibelo kuviki ephelileyo ekweleSouth Africa ezama ukuzibulalela ukuthi uSenelisiwe Ncube akade emgcinile ubeselimalile.
Ekhuluma ku-Facebook uMagotsha uthe uZinjaziyamluma ubefuna ukuzibulala ngenxa yokungaziphathi kwakhe kukanti yena ulethalenta elihle kodwa uphila ngokugcinwa ngabesifazana.
“UMxolisi Zinjaziyamluma Nkomo unathe i-poison ezama ukuzibulala ngemva kokuthi isiwule sakhe simbambile.
Okwamanje ulalisiwe eGeneral esibhedlela seGoli. UMxolisi ngumuntu othanda abafazi babantu lezalukazi esenzela ukugcinwa ngoba leGoli lapha ahlala khona eYeoville irenti ibhadalwa nguSenelisiwe Ncube.
“Ngumculi olethalenta elimangalisayo kodwa asuke azifake amehlo abantu ngokuthanda isifazana ngoba nje esefuna ukuzibulala ebesethandana labangane ababili bambamba okwenze bamtshaya. Omunye nguye omsapotayo nxa eseZimbabwe ngakho ubone ukuthi usengenelwe ngamanzi endlini uzasapotwa ngubani yikho-ke okwenze wazama ukuzibulala,” kutsho uMagotsha.
“Lumculi umculo wakhe uyathengwa sibili kodwa usuka aswele i-direction ngoba kukhanya usebenzela ukugqoka noma nje egqoka izihlangu eziluhlaza kodwa ziyabiza,” kutsho uMagotsha.
Ebuzwa ngale indaba uZinjaziyamluma uthe yena uphilile njalo ngamanga ukuthi wayefuna ukuzibulala, abantu bayamzonda kuphela bambangisa isiphiwo sakhe sokucula njalo uyamazi umuntu okubhalileyo.
“Ngamanga aluhlaza ukuthi bengifuna ukuzibulala noma nje ngike ngagula kancane kodwa kwakungayisikho ukuthi lokhu okukhulunywa ngabantu. Abantu bayangizonda, bangibangisa isiphiwo sami engilaso esokucula yikho bengikhuluma kubi kodwa ngiyamazi umuntu obhale lokhu njalo ngoweTsholotsho kithi.
“Mina ngeke ngazibulala ngitshiya abantwabami, umama, kanye labalandeli bami. Ngisazokhipha idlalade elizakuveza konke lokhu okukhulunywa ngabantu ukuthi ngamanga. Okunye njalo kangigcinwanga ngumuntu, mina ngizigcinile abantu balamanga bangibangisa indondo engazitholayo,” kuphetha uZinjaziyamluma.
