uMthunywa
Khanyile Ndebele
KULENDODA yakoBulawayo etholakale izibophele ngentambo yepulasitiki ngemva kwegalaji leZUVA eliseParkview ngenxa yezikwelede.
UThemba Moyo oleminyaka engu-78 yokuzalwa ohlala eGwabalanda kubikwa mhlaka 22 Mabasa utholakale ezibophele ngentambo yepulasitiki esihlahleni.
Kusolwa ukuthi uzibulele ngoba ubengumuntu obelezikwelede zabantu abanengi nanko phela kubikwa ubethatha imali yabantu ebathembisa izindlu zokuhlala.
uInspector Abednico Ncube
Isikhulumi samapholisa akoBualwayo uAbednico Ncube uthe uMoyo utholakale ezibophele egatsheni lwesihlahla njalo kukhanya ubengumuntu obelezikwelede zemali ebantwini abanengi.
“UMoyo utholakale ezibophele ngentambo yepulasitiki egatsheni lwesihlahla njalo kukhanya ubengumuntu olezikwelede zemali ebantwini abanengi.
Ubeyithatha ebathembisa izindlu zokuloja,” kutsho uInsp Ncube.
Uveze ukuthi ubelekhadi lokuhlatshwa (Vaccination card) eliyilo elenze kwaba lula ukuthola izihlobo zakhe.
“UMoyo ibhulugwe abeligqokile phakathi kwesikhwama salo bekule khadi lokuhlatshwa elenze kwabalula ukuthola izihlobo zakhe,” kutsho uInsp Ncube.
United Bulawayo Hospital
Kubikwa isidumbu sakhe sihanjiswe esibhedlela seUnited Bulawayo Hospitals Mortuary ukuyahlolwa.
U-Inspector Ncube uphethe ngokuxwayisa umphakathi ukuthi udinge izeluleko kwabanye nxa uthe wehlelwa zinhlupho njalo uhlale uthwele izithupha kanye lokunye okuveza ukuthi ungubani ukuze benelise ukuthola izihlobo masinya nxa kwehle isehlakalo esifana lalesi.
“Amapholisa axwayisa umphakathi ukuthi udinge izeluleko nxa uthe wahlanga lenhlupho ezithize ukuze kwenqatshelwe izehlakalo ezifana lalesi.
“Sikhuthaza njalo amalunga omphakathi ukuthi athwale uhlobo oluthile oluveza ukuthi bangobani ngaso sonke isikhathi. Lokhu kuncedisa amapholisa ukuthi aphenye lula kanye lokududuza izihlobo eziseleyo ngokuphangisa,” kutsho uInsp Ncube.
