uMthunywa
Thokozile Mbedzi
ZISELE zinkemile izakhamizi zeHwali eGwanda kulandela ukutholakala kwenye indoda ezibophele ibhunyumunyu esihlahleni.
Umuyi uHandrick Siziba (45) wesiqintini seMpompini khonale eHwali kubikwa utholakale ezibophele kumaviki amabili adluleyo.
Kuzwakale ukuthi impahla zikamuyi zatholakala eceleni kwakhe.
UMthunywa ukhulumisane lezakhamizi zakule indawo eziveze ukuthi umuyi engakazibopheli wayesithi kulomuntu omlandelayo njalo kakwazi ukuthi uzafika ephephile emzini wakhe.
UNkosazana Ratang Sibata ongudadewabo kamuyi uveze ukuthi lokhu bengelankani ngokufa komnewabo.
“Silokhu simadolonzima ngalesiga esisehleleyo emulini, kasikaze sikubone okunje. UHandrick wasuka ePatana esiya emzini wakhe eMpompini ngoLwesine watholakala elenga esihlahleni ngemva kwensuku ezinhlanu okungaba yikhilomitha ukusuka emzini wakhe.
“Kulesinye isakhamizi esisitshele ukuthi wangena emzini waso wathi nxa engalimala kulomuntu omlandelayo emuva. Esingasakwaziyo yikuthi bekungumuntu onjani kumbe bekuyizinto zabantu ngoba lo okhulumileyo uthe umuntu wakhona akambonanga njalo kasamvezelanga ibizo lalowo muntu,” kutsho uNkszn Sibata.
“Silesithuli njengezihlobo ngoba umuntu ozibophelayo asikaze sikubone ukuthi uyaqala akhiphe izigqoko. Lokhu kuyasimangalisa lezakhamizi kazilankani ngesiga lesi, ngitsho labadala bayamangala ukuthi impahla wazikhupha kutheni,” kulandisa uNkszn Sibata.
Esinye njalo isakhamuzi uMnumzana Reason Ndlovu uthe lokhu wathwetshulwa yingwe kakaze abone umuntu ozibophela enqunu.
“Silesithuli kanye lesimanga, umuntu ozibophelayo asikaze sikubone esiba lethuba lokuthi akhiphe impahla, lokhu kuyasethusa njengezakhamizi.
“Sicabanga ukuthi kungabe kulobuthakathi obukhona nxa kungela umuntu ongabe embophele esihlahleni ngoba abantu bagangile.
“Siphile laye uHandrick engumuntu ongelahlupho ebantwini kungakho lokhu kuyasethusa, asikaze sikubone okunje. Sibikele amapholisa ngaloludaba,” kutsho uMnu Ndlovu.
Isikhulumi samapholisa esabelweni seMatabeleland South uInspector Philisani Ndebele uthe ubengakayizwa indaba le.
“Asikayamukeli indaba le kodwa ngizadingisisa ngizwisise ukuthi kwahamba njani,” kuphetha uInsp Ndebele.
