uMthunywa
YiNtatheli kaMthunywa
KULESISEBENZI seyinye iwotela enkulu edolobheni leFolosi esesizame ukuzibulala kwaze kwaba kathathu sisehluleka ngenxa yezikwelede, uMthunywa ukuzwile lokhu.
UVusa Ncube (37), oyisakhamuzi seChinotimba edolobheni leFolosi kubikwa usezame ukuzibulala ngokuzilengisa ngentambo yegetsi kodwa esehluleka.
Sonke isikhathi nxa ezama ukuzilengisa, uncedwa ngomakhelwane.
Abafakazi abaqotho abakhelane loNcube batshele iphephandaba likazulu kuliviki ukuba uNcube osebenza ewoteleni yakulelidolobho usezame waze wahawula ukuzibulala kodwa kungenela bona omakhelwane basize impilo yakhe.
Udaba lukaNcube lo selugcwele emlonyeni yezakhamizi zeFolosi ezifakaza ukuthi lindoda yancedwa ngumakhelwane wayo owafika waquma intambo yegetsi lapho eyayisizibophele khona kumaviki amabili adluleyo.
Kubikwa uNcube uhlala exabene lomkakhe uSibonisiwe, okuyikho okwenza kucatshangelwe ukuthi yikho okwenza athathe inyathelo lokuzibulala.
USibonisiwe kubikwa wayengunkosikazi kamfowabo kaNcube kuminyaka embalwa edluleyo.
Intatheli zikaMthunywa zifike elokitshini leChinotimba zidingisisa ngodaba lolu kodwa uMnu Ncube wala wemba phansi ethi omakhelwane bayamhlolela.
UMthunywa ufike emzini kaNcube edingisisa ngodaba lolu, uNcube lomkakhe, uSibonisiwe, balandula konke okukhulunywa ngomakhelwane.
UNcube lomkakhe babike ukuba omakhelwane babo bakhuluma amanga njalo bona abala ngitsho isikwelede ngoba ‘‘balento zabo’’. UNcube uthe ucabangela ukuthi amanga la amemethekiswa ngamaloja akhe azama ukuvala ukuthi abhadale isikwelede esibiza i$1 000.
“Akulanto enjalo. Ngangizihlalele endlini ngesikhathi ngisizwa ngamahungahunga la. Abantu bayakuthanda ukukhuluma amanga. Intambo le abakhuluma ngayo ngeyokuwuka i-mosquito net, kodwa nampa besiqambela amanga bethi ngifuna ukuzibulala ngayo,” kutsho uNcube.
UNcube ubike ukuba wezwa ngodadewabo ukuthi kulamahungahunga okuzama ukuzibulala kwakhe asegcwele ilokitshi leChinotimba.
“Ngethuka ngitshelwa ngudadewethu ngesikhathi engibuza ngalokhu. Ngifuna ukwazi ukuthi ngobani abatshela abantu amanga anje.”
Uqhubeke wathi: “Mhlawumbe kulomunye uVusa hatshi mina.”
UNcube uthe ulenotho enengi okokuthi kaboni isizatho sokuthi azibulale.
“Sihlezi kuhle lomkami. Akulazikwelede esilazo. Silezindlu ezinengi njalo mina ngilomhlambi wenkomo engawutshiyelwa ngubaba. Pho ngiyabe ngifuna ukuzibulala ngitshiya konke lokhu.”
“Nxa lifuna ukuloba loludaba angiboni kunceda ngoba mina lomkami asaziwa ngabantu, kulama-celebrity ongabhala ngawo hatshi thina,” nguNcube lo engasafuni ukukhuluma esiyaphambili.
UMthunywa uxhumane lokhansila ka-Ward 9 eFolosi uSomvelo Dlamini obike ukuba ngempela uyalwazi udaba lukaNcube.
“Ngezwa ngalindaba njalo sekwenzakale kathathu undoda lo ezama ukuzibulala. Abantu abafunde ukuxoxisana nxa bethe bahlangana lendubo empilweni zabo. Amapholisa asikhuthaza njalonje ukuthi thina amakhansila sicebise izakhamizini ukuthi zidinge uncedo hatshi ukuzama ukuthatha impilo yabo,” ngukhansila uDlamini lo.
UMthunywa udingisise udaba lolu emapholiseni kwatholakala ukuthi kalufikanga.
