uMthunywa
YiNtatheli kaMthunywa
OKWENZA uMandla Mpofu sekufike lakuBrito.
Yiso isimo esibhekane lequla labaqeqetshi beqembu leHighlanders, elilokhe lidinga iqhinga lokunqoba kumidlalo yalo isemangweni.
Umqeqetshi uBarltemar Brito ufice kulabadlali abatshiywa nguMandla Mpofu owaxotshelwa ukwehluleka ukunqoba.
UBrito kazange azikhathaze ngokudinga abadlali abatsha, wakhetha ukuthi adlalise ithalenta elikhona.
Ukwehluleka kukaMpofu ekulolongeni abadlali abenelisa ukuhlohla, sekuze kwamfica lomqeqetshi omutsha.
Ukumelana nge 1-1 leqembu leHerentals ngoMgqibelelo odluleyo, kumdlalo weligi yeCastle Lager, akuzange kubaphathe kuhle abalandeli.
iligi yeCastle Lager
Kuzatshayisa ngovalo njalo ukucabanga ukuthi ithimu ingaphuma lemiklomelo yonke kulimpelaviki mhla idibana leTriangle kumdlalo wenkezo yeChibuku Super.
Umdlalo lo usenkundleni yeGibbo.
IHighlanders yaba yintshantshu yenkezo yeChibuku ngesizini ka-2019.
Ukudlala kwayo kulinkezo lonyaka kuzayidonsela amehlo, kulindwe ukuba kubonakale ukuthi iyomele okungakanani inkezo le.
UMthunywa uxhumane labanye abalandeli beHighlanders abaziwa ngokuthi yi “Team Away” ababukela yonke imidlalo yaleliqembu nxa isemangweni.
Abalandeli laba bathe umdlalo wabo leTriangle uzaveza ukuthi uBrito ngumqeqetshi onjani.
Ngelanga iBosso isehluleka ukunqoba iHerentals eNational Sports Stadium, abalandeli batshengisela kumqeqetshi ngokumhoza lokulabhula izandla, bemtshela ukuthi abathokozi lakancane ngokwenzakala eqenjini.
Umqeqetshi lo wanqoba kathathu, waqeda engutshiki lobhanqa kathathu, wanqotshwa kumdlalo owodwa. Usekhuze kumidlalo eyisikhombisa lokhe wafika koBulawayo.
Abacubunguli bomdlalo bathi umqeqetshi lo wenze kuhle nxa kukhangelisiswa isimo semiklomelo aselayo ngalesi isikhathi esifitshane.
Isicebiso abalaso kuye yikuthi aphangise ukufaka umqondo wakhe kubadlali.
UThandolwenkosi Nyoni ongumcubunguli wenguqu utshele iphephandaba likazulu ukuthi uBrito engadeleli ukubekezela kwabasekeli beqembu.
“Isikhathi siyahamba njalo abalandeli bafuna ukubona impumela yokunqoba.
Kade belindile kusukela kusaqeqetsha uMandla ngakho kazame ukuphangisa ukuletha inguquko. Umdlalo wenguqu awula zwelo kubaqeqetshi.
uMandla Mpofu
“Nxa simqathanisa loMandla, ngimbona engcono kakhulu. Iqembu likaMandla laqeda imidlalo elitshumi lasithupha, lithwele imiklomelo elitshumi lantathu kuphela.
Nangu uBrito, ngemva kwemidlalo eyisikhombisa uthwele imiklomelo elitshumi lambili. Kulomehluko. Uyathembisa lumqeqetshi,” kutsho uNyoni.
Labo ababukela iqembu nxa lisemangweni, bayakhala.
“Ufike watshintsha indlela abadlali abamiswa ngayo enkundleni, kuyasolisa lokho,” nguThemba Ndlovu lo, omunye wabalandeli.
Omunye wabalandeli abakhonona ngoBrito, uSusan “MaTsha” Tshabangu uthe sebezisola ukuthi kungani bajabulela ukuxotshwa kukaMpofu.
“Uzalandela uMandla nxa engasoze alethe inguquko la. Mina angiboni ukuthi uyenzani.”
UNkululeko Tshambo uthe kungabe kukuhle ukuthi banikeze umqeqetshi omutsha ithuba kodwa kazame ukuthi anqobe imidlalo yenkezo.
Kusenjalo, uBrito ayisuye yedwa umqeqetshi osenkingeni. Umqeqetshi weChicken Inn uJoey Antipas uhlalele evalweni ngokuhlangana leHarare City kumdlalo wenkezo yeChibuku Super.
Ekhuluma loMthunywa esecingweni ngoLwesithathu ekuseni, uAntipas uthe uyazi ukuba umdlalo lo uzakuba nzima.
IHarare City yake yabayintshantshu yenkezo le, yenelisa ukuthi idlale kumqhudelwano weCaf Confederations Cup.
“Sidlala leqembu elandise ukuqina nxa kudlalwa imidlalo enjangale,” ngu-Antipas lo.
“Sidlale layo ngempelaviki, sayinqoba nge 1-0 kumdlalo weligi, kodwa lokho akutsho ukuthi kumele sigoqe izandla. Sizazama ukuthi siyibambe, senelise ukufinyelela isigaba esizayo.”
Imidlalo yeChibuku Super Cup
Chicken Inn v Harare City; FC Platinum v Tenax; Dynamos v Whawha; Manica Diamonds v Yadah; Triangle v Highlanders; Black Rhinos v CAPS Utd; Ngezi Platinum v Herentals; Bulawayo Chiefs v ZPC Kariba
