uMthunywa
IGULA elidala livame ukunuka amasi Mthwakazi kaNdaba, lokhu kuvela sobala ngephephandaba likazulu elidume ngezimnandi kusukela lisungula kuze kube lamuhla. Ngitsho ngoba namhlanje lize lentombi emhlophe uFortu Dawoo ezojabulisa uzulu iviki yonke, kayiculi nje ingena kuxege ibhulugwe endodeni.
Kambe kungaba yiphi ingilosi le ecula kangaka ngaphandle kukaFortune Sibanda odume ngokuthi nguFortu Dawoo intombi empofu ecula iDisco Music kunyakaze ngitsho lentethe ezizicatshele emthunzini wotshani.
Ungazizwela okunengi ngaye kungxoxo ephakathi kwentatheli yephephandaba likazulu uCornelius Luphahla (CL) lomculi wodumo uFortune Sibanda (FS).
CL: Akutsho ngamafitshane ntombemhlophe ubikele uzulu mayelana lembali yakho kanye leyomculo wakho.
FS: Mina ngazalwa mhlaka 18 Ncwabakazi ngomnyaka ka1987, esigabeni seMphafeni esiseTsholotsho. Ngasuka lapho ngayafunda uGiredi 1 ngomnyaka ka1994 eWondola Primary School. Ngaqhubeka njalo ngayafunda uFomu 1 eLobhengula Secondary School ngo2000 ngaze ngayaqeda uFomu 4 ngo2003. Ngasuka lapho ngayafunda kwele South Africa ngo2004.
Ukucula ngaqala ngo2010 sengiseSouth Africa, noma ngangivele ngithanda ukucula kodwa ngingakaziwa emphakathini njengoba nje ngangisasemncane.
CL: Umphakathi uthanda ukwazi ukuthi njengomculi sowakhipha amadlalade amangaki njalo wandise ukuculela ngaphi ingoma zakho ntombendala?
FS: Lokhe ngaqala ukucula sengakhipha amadlalade amahlanu njalo ngisazoqhubeka ngicula. Amadlalade la agoqela elithi Sokurongo engalikhipha ngo2010, elithi Bazam’inhlanhla elika2011, elithi Uyazisola, elika2012, elithi Umzukulu, elika2014 lelika2015 elithi Celebration engalikhipha ngiloNtombi Marumbini.
Ingoma zami ngandise ukuzitshayela emikhosini etshiyeneyo egoqela imitshado, imidlalo, kanye leminye imikhosi etshiyeneyo. Kwesinye isikhathi ingoma zami ngandise ukuzitshayela kuma-shows kweleSouth Africa kanye lakithi eZimbabwe.
CL: Akutsho Fortu, abantu bathini ngomculo wakho njalo ukhangelele ukwenzelani uzulu lonyaka?
FS: Abantu bayawujabulela kakhulu umculo wami bangikhuthaza ukuthi ngiqhubekele phambili ngicula ngoba ngiyabajabulisa kakhulu. Inkuthazo le ngiyithola ebantwini abavela endaweni ezehlukeneyo ezigoqela iSouth Africa, Botswana, Zimbabwe, United Kingdom kanye lamanye amazwe atshiyeneyo.
Ngalokhu-ke lonyaka ngikhangelele ukuvakatshela endaweni ezitshiyeneyo ngisenza ama-shows ami ikakhulu kwelakithi koMthwakazi. Lokhu ngizakwenza ngoNtulikazi lapho engizavakatshela indawo ezigoqela iTsholotsho, Lubimbi, Bulawayo kanye lezinye indawo ezehlukeneyo ngijabulisa uzulu.
CL: Tshela mina ngilosi, njengomculi sowathola sicoco bani kwezomculo njalo ngaphandle kokucula msebenzi bani owenzayo?
FS: Lokhe ngaqala ukucula kangikaze ngithole isicoco ngenxa yokuthi ngandise ukuculela kweleSouth Africa ngakho kubanzima ukuthi ngithole isicoco njengoba kungayisikho kithi. Ngakho-ke sengizabhalisa umculo wami kwelakithi ukuze ngenelise ukungena emincintiswaneni yezomculo.
Ngaphandle kokucula ngiyasebenza kweleSouth Africa ngingu-manager enkampanini ethiwa yiPuws Resort njalo ngile studiyo sami esithiwa yiBright Future Studio, khonapha eSouth Africa.
CL: Njengomculi bunzima bani oyake uhlangane labo njalo nkuthazo bani oyipha abaculi abasacathula?
FS: Ubunzima engihlangana labo njengomculi yikuthi abanye abantu bayangintshontshela umculo wami bawuthengise ngentengo ephansi okusuka kubenzima ukuthi umculo engiwuthengisayo uthengwe kuhle njengoba abantu bayabe sebethenga kulabo abawutshiphisayo.
Ngokunjalo abaculi abasasungula ngibakhuthaza ukuthi baqhubekele phambili ngokucula bengadeli ukuze bathuthuke. Okunye njalo kuqakathekile ukuthi bahloniphe uzulu ukuze bathole abalandeli abanengi bathuthuke.
