uMthunywa
Ethel Ncube
KULENINA leChipale eBinga elitshiye izakhamizi zingelamathe ngemva kokubilisa umgqomo wamanzi laqunga elinye ngoba lisehluleka ukubhadala isikwelede sentolwane eseRTGS$5, uMthunywa ukuzwile lokhu.
Isindabaphenduli le yenzakale emavikini amabili adluleyo lapho uSharon Shumba athethe amanzi abilayo wathela uNkosazana Phumuzile Sibanda kubangwa isikwelede sentolwane.Intatheli ixhumane lesinye isakhamuzi sakule indawo uNkosazana Delisani Sibindi onguye owayekhona lokhu kusenzakala.
“Kukhanya uPhumuzile wakweleda esinye isihlobo sakhe intolwane. Lesosihlobo esihlala kwenye indawo kukhanya besilokhu singakabhadali imali le yikho nje okucine kusenza ukuthi uSharon acine ebasa umlilo egangeni.
“Mina ngambona sibili ebasa umlilo ngisiya esivandeni sami, ngithe sengiphuma loPhumuzile sezwa sesithelwa ngamanzi abilayo evela emoyeni singaboni muntu owathelileyo. Ngenhlanhla amanzi la athi esiyafika emzimbeni kaPhumuzile ayengasatshisi kakhulu,” kubika uNkszn Sibindi.
Ungezelele wathi uPhumuzile watshaywa luvalo wawela phansi.
“Eqeda kuthelwa ngamanzi wawela phansi wathula okwemizuzwana kukhanya ukuba ulesithuli. Sithe sisabuzana ukuthi amanzi avela ngaphi uShumba wathutsha lenkonxa yakhe engasadlanga nkotshana ethi khona ezabilisa amanye nxa engabhadalwanga,” kutsho uNkszn Sibindi. Intatheli ixhumane loShumba owale ukuchaza ngesikwelede sentolwane.
“Imibuzo yakho ngeke ngiyiphendule,” kutsho uNkszn Shumba.
Ekhuluma loMthunywa uPhumuzile Sibanda owatshiswa ngamanzi uvumile ukuba ulesikwelede.
“Ukuba lesikwelede ngilaso sibili kodwa bekumele ngize ngitshe yini ngifela imali yentolwane, ngabe amanzi la abetshisa kakhulu ngabe ngingaphi khathesi,” kuphetha uPhumuzile.
