uMthunywa
Thokozile Mbedzi
ZILOKHU zidlela evalweni izakhamizi zePlumtree ngemva kokuba enye indoda ixhonxwe kasikhombisa ngengqamu ngoguluva andubana itshontshelwe i8 000 Pula kanye leRTGS$100.
UMnumzana Mcebisi Ncube oleminyaka engu-20 uhlaselwe ngoguluva ababili ngeviki ephelileyo mhlaka 12 Lwezi ngehola lika-8 ntambama.
Omunye umfakazi kusehlakalo lesi uMnumzana Mbonisi Khabo uveze ukuthi ubezihambela ngemota ngesiqubu esincane aze abone uNcube ehlaselwa ngoguluva ababili ezihambela.
“Bengihamba kancane nje ngemota yami ngasengibona amadoda amabili esima ngemva kokuba esenanzelele ukuba uNcube uhamba yedwa. Lami kwangihlupha ukuthi kungani amadoda la esima kwangihlupha ukuba banxwaneleni.
“Ngithe ngisathi ngisakhangele ukuthi vele bahloseni ngabona sebehlasela uNcube lami ngokwesabela impilo yami kangizange ngehle emoteni ngoba ngisesaba ukuba bangangilimaza.
“Kube buhlungu kimi kakhulu ngoba uNcube bamgwaza kanengi kwaze kwaba kasikhombisa elokhu ecela ukuba bamxolele kodwa bona baqhubeka bemhlaba kokuphela bengela xolo bethi bamnika amaphilisi okuba nxa bemlaya enze intando yabo njalo engabaphuzeli,” kulandisa uMnu Khabo.
Uqhubekele phambili esithi omunye wabo waqhubeka emgwaza omunye esemkhuthuza izikhwama.
UNkosazana Metha Msizi ugcizelele wathi yena uzwe ngomkhosi.
“Ngizwe ngomkhosi ngesikhathi lami ngisuka e-border lapho engihle lami ngabuyela emuva ngoba ngisesabela ukuba lami ngingalimala.
“Ngemva kwesikhatshana ngezwa sokuthiwa uNcube uhlaselwe ngoguluva bamgwaza baphinda njalo bamkhuthuza izikhwama,” kutsho uNkszn Msizi.
“Oguluva laba sebesihambisa nzima lapha njalo sesihlala sisevalweni ngaso sonke isikhathi ikakhulu lapha e-border abantu balahlekelwa yimali lempahla zabo kusa kwamalanga abanye baze balahlekelwe yimpilo. Ngikhuluma nje uNcube usesimeni esibi njalo ulalisiwe esibhedlela,” kuchaza uNkszn Msizi.
Isikhulumi samapholisa esabelweni seMatabeleland South uInspector Philisani Ndebele ebuzwa ngodaba lolu uthe kalukafiki kuye kodwa uzaludingisisa.
