uMthunywa
Johas Moyo
KUSEHLAKALO esisemlonyeni yezakhamizi zemgodini weBhobhisi eKwekwe kulomakorokoza obesehluphile ngokutshaya abantu kanye lokubathathela igolide labo okubikwa ubingelelwe yindwangu ebithunyiwe waphambana ingqondo.
Indoda le, uTichaona Dzenga ebisaziwa ngokuthi nguNyavunyavu ebikhathaza ngokutshaya abantu ibathathela legolide labo ize yahlangana losowabo nanko phela kubikwa ukuthi waxhawulwa yindwangu okucatshangelwa ukuthi yayithunyiwe yahle yaphambana ingqondo.
Kubikwa uNyavunyavu ubehlukuluza abantu ngoba eleziqwanga obekubangela ukuthi bamnike izinto esebenzisa udlame okuyikho okucatshangelwa ukuthi kwabangela ukuba acine ethunyelwa indwangu.
Kubikwa njalo ukuthi inkosikazi yakhe seyake yabingelelwa lijuba ithanyela egumeni okucatshangelwa ukuthi wayezotshelwa ukuthi akhuze indoda itshiyane labantu.
UMthunywa uxhumane lomngane kaNyavunyavu uMnumzana Lymon Ndoro oveze ukuthi isiga lesi sikhulu njalo kumele bamuse kubosiyazi ngoba baleqiniso ukuthi uphoswe ngabantu ababuhlungu ngokuhlukuluzwa kanye lokutshaywa.
“Ngilokhe ngingakholwa njalo ngitshaywa luvalo ngokwenzalakayo lapha.
“Yebo uyaphambanisa umngane wami ikakhulu engadakwa njalo ngiyamkhuza kodwa ukumthumela indwangu kusuke kwadlulisa amalawulo ngoba kusobala ukuthi bafuna ukumqeda du abantu njalo bazondile ngezenzo zakhe,” kutsho uMnu Ndoro.
UMthunywa uphinde waxhumana lonkosikazi kaNyavunyavu Mirriam Ncube yena owalileyo ukukhuluma lentatheli esithi kafuni ukuzembula amakhwapha ngokwemuli yabo.
UMthunywa kenelisanga ukuxhumana loNyavunyavu ngoba kubikwa ukuthi akekho ngoba edukile njalo kusazama amalungiselelo okuthi elatshiswe njengoba kucatshangela ukuthi yizinto zabantu ezingulisayo.
