uMthunywa
Kulenina elizonde lagana unwabu ngemva kokucatshelwa yimali engange R20 okudale ukuthi licabangele ukuba ithethwe ngumntanalo oyinkazana oleminyaka engu -11 laselimtshisa ngamanzi emhlane walimala kakhulu.
Isiga lesi senzakale ngoLwesine kuviki ephelileyo lapho inina elihlala eA section e Botshabelo eSouth Africa elithe ngemva kokucabangela umntanalo ukuba nguye olitshontshele imali yalo laselimtshisa kabuhlungu ngamanzi.
Uninomncane womtwana lo oleminyaka engu-37 ubikele intatheli ukuthi udadewabo uthe esecatshelwe yimali le wabuza umntanakhe wala ukuthi nguye oyithetheyo. Ngemva kwalokho umthuma ukuthi akhe amanzi abilayo awathele ebhakedeni lokuwatsha wasewathela. Kuthe ngethuba umntwana lo etshibilika unina wahle wamthela ngamanzi emhlane waxathuka kabuhlungu.
Kuzwakale njalo ukuthi kuthe ngemva kokuba inina leli litshise umntanalo lihlale amalanga amabili lingamhambisanga esibhedlela.
Uninomncane walumntwana ubuye njalo waveza ukuthi yena uthole umntwana eselimele wasesiyabikela amapholisa ngoba udadewabo uvele uhlezi ebahlukuluza abantwabakhe.
“Mina ngifike endlini kadadewethu ngeNsonto umntwana esetshile. Okungicaphula kakhulu yikuthi udadewethu uthe ngemva kokutshisa umntwana wahlala amalanga amabili engamhambisanga esibhedlela. Ngikhuluma nje umntwana ulimele iqolo lonke lengalo yesandla senxele.
“Ngakho bekungelanto ebengingayenza yikho ngibikele amapholisa ngale indaba ngoba udadewethu ngiyamazi ukuthi uyabahlukuluza abantwabakhe.
Isikhulumi samapholisa uConstable Peter Karel ebuzwa ngale indaba uveze ukuthi uyayazi njalo umama lo ubotshiwe uzathonisiswa kungemalanga mangaki.
“Indaba kamama otshise umntanakhe ngamanzi siyizwile ngakho umama wakhona ubotshwe ngoMvulo. Icala lakhe lizathethwa kungemalanga mangaki,” kuphetha uConst Karel. — Ubulembu
