uMthunywa
Thokozile Mbedzi
KUSIHLUKU esitshwaqisa umzimba siphinde sisukumise lenwele ekhanda, kulendoda yeBeitbridge eyoswe amaphambili andubana ithontiselwe amapulasitiki esithweni sayo sangasese kubangwa umfazi.
ULushivha Dube weMadzivhe eBeitbridge wenziwe isihluku lesi ngabanye omakhelwane bakhe akade bemethesa umlandu wokuthatha unkosikazi kamfowabo.
Kuzwakale ukuthi amadodana akoJutas Phophi bahlasela uDube nje kodwa unkosikazi obebangwa ubevele esehlukene lomfowabo. Kubikwa amadodana akoPhophi la abefunga egomela ukuthi umkamfowabo ngeke athathwe ngomunye umuntu ngoba ulokhe engumakoti wakwabo.
Ekhuluma lentatheli kaMthunywa omunye wabomakhelwane uMnumzana Kwathani Ndou uthe abalamathe ngokwenzakeleyo esigabeni sabo ngoba abakaze bakubone ukuthi umuntu uyosiwa afuswe ngomlilo njengamangqina ephila.
“Kwenzakale isehlakalo esingakhulumekiyo njalo uLishivha kangiboni ukuba angaphinda abelempilo enhle ngoba uvuvuke okubi njalo kakulalutho enelisa ukuzenzela lona.
“Abafana laba babasa umlilo bamhlalisa phezu kwawo qede bamthontisela amapulasitiki ngoba besithi bafuna ukuqeda umkhuba wakhe wokuthandana labafazi babantu.
“Ngemva kokumtshisa bamthwala bayamjikela emgodini wamanzi kwasiza omakhelwane abalandela umkhosi wasila ngesikhala senalithi.
Aluba akuzange kube labomakhelwane abamuzwa ehlaba umkhosi bayamsiza aluba sikhuluma ngokunye lamhlanje. Ngikhuluma nje uLishivha kenelisi lutho, uvuvukile uyesabeka lamanzi uwachitha nzima,” kulandisa uMnu Ndou.
USobhuku wakulindawo u-Alfios Ndou ebuzwa ngodaba lolu uvumile wathi lwenzakele esigabeni sakhe njalo kumzwisa ubuhlungu njengomphathi wabantu.
“Ngizwa ubuhlungu kakhulu ngesenzo esenzakele esigabeni sami ngoba uLishivha indlela alimele ngayo angikuboni ezalandela indlela kuhle ngoba ulimele kakhulu.
Mina njengomphathi wabantu kuyangidla ngoba abantu laba bonke balobuhlobo kimi, laba abantwana abenze isiga lesi sokutshisa umuntu ngomlilo ngabantwana bakadadewethu, kungiqeda amandla ngoba akuxazululeki kuhle kimi njalo lezandla zimfitshane zokuba ngincedise laba abalimalelwe ngumntwana ngakho ngicela uzulu labomakhelwane basize ngoba kulobunzima obukhulu. Umfana lo ulimele okuzwayo,” kutsho uMnu Ndou.
Umlisa wakulindawo uLiberty Muleya ebuzwa ngodaba lolu uveze ukuthi kumdanisile ukuthi abafana bakoPhophi bathethe umthetho bawubeka ezandleni zabo bajezisa umuntu bengelamandla okwenza lokhu.
“Mina njengomphathi ngidane kakhulu ngesenzo sabafana laba ngoba abantu nxa belohlupho kumele babike edale loba kwezinye iziphathamandla zomthetho.
“Abafana laba sebehlanyele into embi esigabeni njalo sebeyingozi kumphakathi. Lokhu abakwenzileyo akuqondanga, yikuphambanisa amasiko okucina kubangela ukuthukuthela kwamadlozi esigaba izinto zicine zingasahambi kuhle,” kuphetha umlisa.
