uMthunywa
YiNtatheli kaMthunywa
KULOWINDI oleminyaka engu-25 yokuzalwa welokitshini leCowdray Park koBulawayo omiswe phambi komthethwandaba esetheswa icala lokubamba abantu ngamandla ukuthi bangene emtshoveni awubizelayo kunye lokuluma ipholisa elalifuna ukumbopha.
UNhlanhla Khumalo umiswe phambi kukaMnumzana Busani Sibanda. Ukuthoniswa kwecala leli kudluliselwe kumhlaka 30 Zibandlela njalo uzabuya evela ejele.
Inkundla izwe ukuthi mhlaka 23 Lwezi ngehola lokuqala ngemva kwemini, uMarvelous Ndlovu olipholisa owayebhoda labanye bakhe edolobheni lakoBulawayo.
Kubikwa babona uKhumalo ememezala umtshova ku-6th Avenue. Kubikwa amapholisa la enza angathi ngabantu abahambayo bangena kuHonda Fit eyayisiya eMatopo. Sebephakathi bazichaza andubana batshele uKhumalo ukuthi usebotshiwe.
Bamtshela ukuthi aye enkambeni yamapholisa yeCentral Police Station. UKhumalo wala ukuya enkambeni yamapholisa, watshayela imota yakhe esiya lapho ayefuna khona. Kubikwa watshela amapholisa la ukuthi uya komunye umgodi weMatopo lapho afuna ukufika abatshengisa abangasoze bafa bakukhohlwa empilweni zabo.
Kubikwa efika lapho okuhlangana khona u4th Avenue kunye loJoshua Mqabuko Nkomo, uNdlovu wazama ukubopha uKhumalo owahle waqala ukudla amalahle.
UKhumalo kubikwa wagagadlela uNdlovu isandla andubana amlume kanye.
Elinye ipholisa elalisemoteni le yilo elenelisa ukumbopha.