uMthunywa
Ncekwenhle Ncube
NGENXA yokuthanda utshwala kulowindi weSabasitshani eCross Dete ofuqelwe emgwaqweni okubangele ukuthi atshaywe yimota kubangwa iqhaga le-Batayimunu.
Lesisiga senzakale ngoLwesihlanu kuviki edluleyo ekuseni emavinkilini eCross Dete lapho uButhobenkosi Nyoni atshaywe yimota ngemva kokuba efuqelwe emgwaqweni nguQhubekani, obizwa ngokuthi ‘Bluetooth’, kubangwa ukuthi ubhije utshwala abemgcinise bona ngesikhathi esiya esambuzini.
Kubikwa uNyoni wenze njengenhlalayenza ukuthi nxa bebizela izimota esilindweni samabhasi bayabhemisana baphinde banathisane labangane bakhe engazi ukuthi wayesezithezele olulenkume ngokunatha lobotshwala.
UNkosazana Devine Ngwenya obekhona kusenzakala linkemenkeme yendaba uchaze ukuthi ubecabanga ukuthi laba ababili bebedlala njengansukuzonke kodwa wethuke lapho uNyoni esetshaywe yimota.
“Mina ngizwe uQhubekani elokhe etshingela uButho esithi ufuna utshwala bakhe njalo uphinde wamthembisa ukuthi nxa engekela ukumthengela uzabamba amathumbu ngezandla.
“Abantu kabazange bazihluphe ngenkulumo le ngoba vele amajaha lawa amemezela imitshova bathanda ukudla besethuselana, baze bakholwa ukuthi ubeqinisile kokuthi uButho esethwalelwa esibhedlela,” kulandisa uNkszn Ngwenya.
Kubikwa uQhubekani uthethwe ngamapholisa ngesikhathi uNyoni egijinyiselwa esibhedlela seMpilo koBulawayo ukuze bazame ukusiza umphefumulo.
Esinye njalo isakhamuzi esithande ukwaziwa ngokuthi nguNgwenya nje kuphela sibikele uMthunywa ukuthi bethukile ukuzwa ngalingozi eyehlele uNyoni.
“Kusizwise ubuhlungu ukuzwa ukuthi ujaha lo setshaywe yimota ngoba phela akunsuku zingaki esukume embhedeni elaliselwe ukugxotshwa yimota,” kutsho uMnu Ngwenya.
Omele isikhulumi samapholisa esabelweni seMatabeleland North uSergeant Mashona uthe udaba lolu kabakalwamukeli ewofisini yabo kodwa bazadingisisa ngalo.
“Umbiko lo ubungakafiki ezandleni zethu kodwa sizadingisisa ngawo.
“Njengamapholisa sithanda ukukhuthaza uzulu ukuthi nxa kulokungezwani emphakathini badinge uncedo kubakhokheli bezigaba kumbe emapholiseni.”
