uMthunywa
Cornelius Luphahla
ZISELE zinkemile izakhamizi zesigabeni seZidulini eNkayi kulandela ukuzwa ngelinye inina eliwe engalaneni kamakhelwane wayo litshontsha umumbu ebusuku lephuka iqolo.
Indaba le yenzakale kuviki ephelileyo lapho uNkosazana Jennifer Ngwenya awe khona engalaneni kaMnumzana Mayford Ngwenya ezama ukwehla ngemva kokutshontsha umumbu, uMthunywa ukuzwile lokhu.
Kuzwakale ukuthi uNkszn Ngwenya uhle wathwalelwa esibhedlela seNkayi ngalobobusuku lapho okwavezwa ukuba uqamuke iqolo.
UMthunywa ukhulumisane loMnumzana Sindiso Maphosa oyisakhamuzi sakule indawo waveza ukuthi wabizwa ngemva kokuqamuka kwenina leli njalo indaba le iyamethusa.
“Mina ngezwa sengibizwa koNgwenya phakathi kobusuku ngafika ngathola uMaNgwenya elele phansi eqamuke iqolo elesaka lomumbu eceleni kwakhe.
Sathi simbuza ukuthi ubesenzani wathi ubetshontsha umumbu wasefuqwa ngumuntu angambonanga wawela phansi.
“Okwangimangalisayo yikuthi inyanga yayikhanyisa ngalelolanga okokuthi umuntu lo owamfuqayo kwakufanele ambone kodwa yena wathi kambonanga,” kutsho uMnu Maphosa.
Ekhuluma lephephandaba likazulu uMnumzana Mayford Ngwenya uveze ukuthi yena wezwa umuntu ehlaba umkhosi esizeni sakhe wavuka wathola kungumakhelwane wakhe seqamuke iqolo kodwa kakwazi okwamfuqayo.
“Mina ngathi sengilele ngezwa umsindo womuntu ekhala esizeni sami ngavuka ngathola kungumakhelwane wami elele phansi ethi seqamuke iqolo etshontsha umumbu.
Ngambuza ukuthi uqamuke njani wathi ufuqwe ngumuntu angambonanga.
Lami lokhu kwangimangalisa ukuthi umuntu lowo omfuqileyo uvele ngaphi.
“Okungizwisa ubuhlungu yikuthi abantu sebesithi yimi engatshayisa uMaNgwenya ngondofa bami khonapho mina ngingelabo.
Ngabe ngamtshayisa ngondofa ngangingasoze ngimhambise esibhedlela ngangizamekela kuze kuse,” kulandisa uMnu Ngwenya.
UNkosazana Cynthia Moyo oyisihlobo sikaNkszn Ngwenya ubikele intatheli ukuthi kakwazi ukuthi uMaNgwenya wayengenwe yini aze ayetshontsha umumbu komakhelwane.
“Kangikwazi ukuthi uMaNgwenya aze ayetshontsha umumbu kwakutheni kumbe wayeselambe kakhulu.
Okubuhlungu yikuthi khathesi uyafuthelwa esibhedlela abantwabakhe labo bayafa ngendlala ekhaya.
Aluba wacela kulokuyatshontsha nanku seze waqamuka iqolo,” kutsho uNkszn Moyo.
Usobhuku wakule indawo uMnumzana Ndlovu ebuzwa ngale indaba uvumile ukuthi uyayazi kodwa kayikathoniswa.
“Indaba yenina elephuke iqolo litshontsha umumbu engalaneni kamakhelwane ngiyizwile kodwa kayikathoniswa enkundleni yami ngoba inina lakhona lisesibhedlela,” kuphetha usobhuku uNdlovu.— Ubulembu
