uMthunywa
Ethel Ncube
ZEHLELWE liyezi elimnyama izakhamizi zeMarangana eBinga ngemva kokuba esinye isivakatshi ebesivela eGokwe sihlahlele abantu abahlanu belandelana kuviki ephelileyo.
Udaba lolu lwenzakale ngempelaviki lapho uMnumzana Christopher Gotore ongumetheswacala agamule abahlanu laba bafa ababalisa uAdmire Nyangarai, uBibeat Munsaka, Loice Compassion olomnyaka owodwa wokuzalwa, Nyangarai kanye loChiravigwa Shumba. Bonke laba baganyulwe belandelana.
Ekhuluma loMthunywa omunye wezakhamizi zakule indawo uMnumzana Daniel Ndlovu uveze ukuba kuliqiniso ukuba kulabantu ababulawayo endaweni yabo.
“Silusizi ngesiga esenziwe ngumfana lo obevakatshele udadewabo kanti usezoqeda abantu ebabulala, isizatho sakhona asaziwa. Kuthiwa umfana lo wayelele ebusuku kwathi kutshaya ihola letshumi ebusuku wavuka wadobha ihloka wagamula omunye umzukulu wakhe ayelele laye.
“Lo omunye uthe ebona sekukhala ihloka wacela ezinyaweni wabaleka yikho ukusinda kwakhe ekufeni. Uthe eqeda kubulala umzukulu waphuma phandle umkadadewabo wazama ukumbamba kodwa wayevele engasabambeki sokungathi uselobhova esefuna nje ukusebenzisa ihloka kuphela.
“Waqhubeka wagamula omunye andubana aye kubomakhelwane lakho ayegamula abanye. Wathi eqeda wahamba esibayeni wayagamula inkomo lethole kwafa,” kutsho uMnu Ndlovu.
Ekhuluma lentatheli omunye wezinduna ohlala bucwadlwana kwale indawo induna uSiansali uvumile ukuthi indaba le iliqiniso.
“Angikathintani lenduna uSinamagonde, lapho ahlala khona amafoni ayahlupha ukungena kodwa ngizwe ukuba kulabantu abangu 5 ababulawa ngehloka yisivakatshi.
“Umsolwa ubevakatshele udadewabo kwathi ebusuku wavuka wadobha ihloka wagamula umzukulu ayelele laye. Ngemva kwalokho waya emzini wakomakhelwane wayabulala abanye. Uthe eqeda ukubulala abantu wayabulala lenkomo ezimbili,” kutsho iNduna uSiansali.