uMthunywa
YiNthatheli kaMthunywa
UKAPUTENI weChicken Inn uDanny Phiri kahlalisekanga, uphethwe luvalo lokwesaba ukuyangiswa ngokunqotshwa yiMamelodi Sundowns mhla amathimu womabili edibana enkundleni yeBarbourfields ngoMgqibelo.
Ngokutsho komkhokheli wabadlali lo, umdlalo womkhankaso weConfederations of African Football Champions League lo uzabatshiya besesula amaginqo ngoba ufuna ukuthi abadlali bonke babophe ziqine.
Umdlalo lo uzabe ungowokuqala kulumkhankaso. Ihlandla lesibili lizadlalwa eSouth Africa kumaviki amabili alandelayo.
Abadlali beSundowns abangabagadli lalabo abadlali abesesiswini bazenzela umathanda ngokuhlohla amabhola kuligi yeAbsa eSouth Africa kulisizini. Ukudlala ngokutshelela abakwenzayo kukhanya yikho okwethusa inkamba yeChicken Inn.
UPhiri usekhuze abanye bakhe, wabacela ukuthi bajulise ingqondo zabo kusese lamalanga nje ukuthi bemukele izethekeli.
“Isicelo sami yikuthi sizibambe njalo siqhubeke sidlale owethu umdlalo lanxa iSundowns isihlupha ngoMgqibelo.
Umdlalo lo, angifuni ukuqamba amanga, uyangethusa. Akusimdlalo omncane lo. Ukusebenza nzima yikho kuphela okuzasinceda. Kumele sizibambe ngoba ithimu esidlala layo, iSundowns, iyalazi ibhola okuzwayo,” nguPhiri kungxoxo ayinikeze uMthunywa phakathi kwaliviki ngesikhathi elolonga leqembu lakhe emagumeni.
Ukaputeni wentshantshu zebhola leZimbabwe lo uthe umdlalo lo bazawuqakathekisa ngenxa yokuthi uzabukisa ubungcitshi babadlali bethimu le, kubanikeze ithuba lokuthi bahawukelwe ngamathimu akwamanye amazwe.
Kusenjalo unobhala weChicken Inn uTavengwa Hara ubike ukuba abalandeli bomdlalo bazabhadala i$3 kuphela ukubukela lumdlalo.
“Ukuze sikhuthaze abantu bakithi, ukungena eBarbourfields kuzakuba yi$3.
“Sinxusa bonke abalandeli bomdlalo wenguqu ukuthi babuye ngobunengi babo ukuzosekela ithimu yethu enkundleni yeBarbourfields ngoMgqibelo. IChicken Inn ayilabasekeli abanengi ngakho sinxusa abasekeli bomdlalo ukuthi basincedise ngokuza ngobunengi mhla womdlalo.”
UHara uthe iChicken Inn izakwenza imikhosi ethile emalokitshini lasenzikini yedolobho lakoBulawayo lapho abazakhuthaza khona abathandi bomdlalo ukuthi bayegcwalisa inkundla yeBF.
IMamelodi Sundowns ikhangelelwe ukuthi ifike koBulawayo ngoLwesihlanu ekuseni. Ithimu le kubikwa izalolonga emagumeni emini, andubana iphumule ilinde umdlalo wangoMgqibelo.