uMthunywa
Thokozile Mbedzi
KUDABA olusegudwini elokitshini leTshabalala koBulawayo kubikwa kulendoda etshontshe intambo zamagetsi, qede yathumba isithandwa sayo okwamalanga amane.
intambo zamagetsi
Kubikwa uBrian Maswanhike oleminyaka engu-29 yokuzalwa uthumbe isithandwa sakhe (36) okwamalanga amane esivalele endlini engavumi ukuthi siphume phandle.
Ngokudingisisa kwephephandaba likazulu, lokhu kwenzakala ngoMvulo.
Abafakazi abaqotho babike ukuthi uMuswanhike weba intambo zamagetsi wazifihla endlini yakhe, njalo ubedingwa ngamapholisa.
Akwaziwa ukuthi kuyini okudale ukuthi asuke lapho ayevalela isithandwa sakhe endlini okwamalanga amane.
Ekhuluma lentatheli kaMthunywa uNkosazana Judith Phiri ohlala kulindawo uthe .
“Sibone inkemenkeme silapha, njalo silokhu simangele singomakhelwane.
Abangakibo kwentombi badinga umtanabo baze baphelelwa, kungasela themba lokuthi usaphila.
Kwacina sekuphuma ilizwi lokuthi wacina ukubonakala ehamba loBrian, okuyikho okwaletha umkhondo wokuthi angabe engaphi.
Yikho njalo okwenza imuli le yayabikela amapholisa.”
UNkszn Phiri uthe amapholisa kazange aphozise amaseko, ahle agijimela endlini kaBrian.
“Sizwe ukuthi wamkhipha ngefasitela wamtshela ukuthi asuke ahle anyamalale.
Silapha silokuthaba kakhulu ngoba intombi le itholakale iphila.”
Isikhulumi samapholisa koBulawayo u-Inspector Abednico Ncube uthe bacubungula udaba lolu.
uInspector Abednico Ncube
“Udaba lwendoda ethumbe owesifazana ethandana layo yamgcina amalanga amane ihlala laye solufikile ehofisini lethu.
UBrian Maswanhike oleminyaka engu-29 yokuzalwa ubevele edingwa ngamapholisa eTshabalala esolwa ngokutshontsha i-copper.
“Ngakho kuthe kuvela njalo umbiko wokuba uthumbe idlalicatsha lakhe elileminyaka engu-36 yokuzalwa, amapholisa asukumela phezulu,” kutsho u-Insp Ncube.
Uthe amapholisa afice esekhuphe idlalicatsha leli ngefasitela.
“Kutholakale ukuthi ubefihle intambo ze-copper esikhwameni, ejonge ukuthi ayezithengisa.
Uzikhulumele ukuthi wazitshontsha eHillside.
Kungakho amapholisa asaphenyisisa ngodaba lolu. Sibonga uzulu ngokusebenzelana kuhle lamapholisa.
Kungakho sicela wonke umphakathi wakoBulawayo ulandele inyathelo elihle elenziwe yizakhamizi zelokitshini leTshabalala.”
