uMthunywa
Ethel Ncube
KULESELA lesigabeni seMapfungautsi eGokwe elitshiye abantu akade bebuthene esililweni semuli yakoPendekwa bebambe umlomo wangaphansi kulandela ukutshontsha imota qede layabhewuka ngayo.
Isiga lesi senzakale ngempelaviki lapho umsolwa uTashinga Courage Mutengarenga etshontshe imota kaDesire Pendekwa oyomhlobo weHonda CVR emfeni.
Kuzwakale ukuba umsolwa lo laye wayebuye esililweni, kodwa wacina esetshontsha imota ngesikhathi imiswe phandle komuzi. Kubikwa abanikazi bemota bathi bethi mehlo suka babona imota ingasekho basebetshayela amapholisa wona afika kuleyondawo ngokuphangisa.
Ekhuluma lentatheli omunye wezakhamizi uMnumzana Farai Moyo uveze ukuba balesimanga lomuntu obuye esililweni elande ukuzotshontsha.
“Umsolwa lo kukhanya wathi ebona ukuthi abantu baphathekile ngokomngcwabo yena wangena emoteni watshaya wachitha.
“Thina sananzelela sesibona imota sezigijimisana leyamapholisa emgwaqweni kanti ayevele esehlezi izithende isela leli. Lokhu kwacina kubangela ukuthi libhewuke isela leli,” kubika uMnu Moyo.
UMthunywa uxhumane lesikhulumi samapholisa eMindlands uInspector Emmanuel Mahoko oveze ukuba udaba olunjalo solufikile ezandleni zabo.
“Udaba olunjalo lwafika endlebeni zethu njalo sibonga umphakathi owancedisa kakhulu ukuze umsolwa abanjwe ngoba bancedisa ekusincwebeni indlebe imota yatholakala.
“Ngithanda ukuxwayisa njalo abatshayeli ukuba nxa bepaka imota zabo batshiye bekhiyile izivalo zemota,” kuphetha uInsp Mahoko.
