uMthunywa
Cornelius Luphahla
KWENZAKALE insindabaphenduli yendaba esigabeni seSipopoma eLupane ngemva kokuba omunye umalukazana wesakhamuzi sakule indawo ethethwe yisavunguzane kwaze kwaphinda kabili esiyakukha amanzi isenzo okucatshangelwa ukuthi sithunywa nguninazala.
Isiga lesi kubikwa saqala ngemva kokuba uNkosazana Nokuthula Ndlovu obethethwe nguMnumzana Khulumani Dube exabane loninazala uNkosazana Phephelaphi Ncube ethi kamfuni emzini wakhe qede wathathwa yisavunguzane kwaze kwaba kabili okudale ukuthi atshiye umendo, uMthunywa ukuzwile lokhu.
UMthunywa ukhumisane loNkosazana Samukele Moyo owayehamba loNkszn Ndlovu mhla ethathwa yisavunguzane wathi yena wabona isavunguzane simphakamisa wamangala ukuthi kwenzakale njani.
“Mina ngathi ngihamba loMaNdlovu sisiyakukha amanzi emgodini kwathutsha isavunguzane esikhulu saqonda kithi.
“Sithe sidlula sathatha uMaNdlovu sayamlahlela phambili kodwa kazange awele phansi.
“Lokhu kwangidanisa ukuthi kungabe kuhamba njani ngoba angikaze ngizwe kuthiwa kulomuntu othethwe yisavunguzane,” kutsho uNkszn Moyo.
UMnumzana Edwin Ncube oyisihlobo sikaNkszn Ncube uchaze ukuthi ngemva kokuthathwa kukaNkszn Ndlovu yisavunguzane wahle wahamba kibo wathi ephenduka samphinda okudale ukuthi atshiye umendo.
“UMaNdlovu wathathwa yisavunguzane ngemva kokuxabana loninazala ethi kamfuni emzini wakhe ngoba umntanakhe usasemncane kakafanelwa yikuthatha.
Kwathi kunjalo wathi nxa elenkani uzazibonela, kuthe kungakedluli nsuku zingaki wathathwa yisavunguzane.
“Sathi sesimthethe wabuyela kibo wasephenduka kuviki ephelileyo kwathi kungakapheli insuku ezimbili ephendukile samphinda futhi okudale ukuthi atshiye umendo abuyele kibo.
“Lokhu kuyasimangalisa lathi sibili ngoba kasikwazi ukuthi umuntu uyathathwa yisavunguzane.
“Ngokubona kwami kukhona omgadlayo sibili ngakho uqondile nxa ehambile ngoba kwelinye ilanga singambulala isavunguzane lesi,” kulandisa uMnu Ncube.
UMnu Dube ebuzwa ngale indaba uthe yena wayengekho mhla kusenzakala lokhu ngeke akhulume lutho kodwa umkakhe uhambile.
“Mina umkami ethathwa yisavunguzane ngangingekho ngezwa sengibikelwa ngakho ngeke ngikhulume lutho ngoba kangikwazi lutho.
“Engikwaziyo yikuthi umkami ubengezwani lomama njalo uthe ngeke aqhubeke ehlezi lami ngoba uzabulawa yisavunguzane,” kutsho uMnu Dube.
Ebuzwa ngale indaba uNkszn Ndlovu uvumile ukuthi uyayazi wathi yikho okudale ukuthi atshiye umendo.
“Kuliqiniso sibili ukuthi sengathathwa yisavunguzane kwaze kwaba kabili ngemva kokuthi umamazala ethe ngizazibonela nxa ngingafuni ukutshiyana lomntanakhe.
“Isavunguzane lesi sasingiphakamisa siyengilahlela phambili ngisale ngingasaboni ukuthi kuhamba njani okwesikhatshana ngibuye ngilunge.
“Yikho ngisukile ngoba ngibone ukuthi ngingaphetha ngisifa,” kutsho uNkszn Ndlovu.
UMthunywa ukhulumisane loNkszn Ncube ovumileyo ukuthi kazwanani lomalukazana wakhe.
“Kuliqiniso ukuthi kasizwani lomalukazana wami kodwa okokuthi yimi engimthumela isavunguzane ngimsulwa kulokho,” kuphetha uNkszn Ncube.
