uMthunywa
Cornelius Luphahla
LOKHU ithithibele imuli yakoVundla esigabeni seDlawa eNkayi ngemva kokuba itshiselwe umuzi phakathi kobusuku ilele njalo kucatshangelwa ukuba esinye isakhamuzi sakule indawo esadlelwa amabele zinkomo zale imuli silesandla.
Isiga lesi senzakale ngoLwesihlanu kuviki ephelileyo lapho uHlalani Vundla lomkakhe uLethiwe Mpala abatshiselwe khona umuzi belele kubangwa inkomo zabo ezidle amabele kametheswacala.
UMnumzana Thabani Ncube oyisakhamuzi sakule indawo ubikele intatheli ukuthi nguye owanceda uVundla lomkakhe.
“Ngathi ngizihambela ngivela etshwaleni phakathi kobusuku ngabona umuzi kaVundla usitsha ngagijima ngafika ngatshaya isivalo savuleka basebevuka.
“Ngazama ukukhipha impahla kodwa ngehluleka ukuziqeda njengoba ngangizikhipha ngingedwa uVundla lomkakhe bona lwaselubatshaye lwabeqa uvalo.
“Into eyasimangalisayo yikuthi izindlu lezi zombili zatsha njani ngoba zingekho eduze duze. Impahla zonke zaloba. Sathi sesikhanyisa sidinga ukuthi ngubani ongabe etshise indlu le sabona unyawo lomuntu obehamba ngepatapata kwathi sesilulandela ekuseni lwaphetha solusicatshele lapho oluvele khona,” kutsho uMnu Ncube.
Ebuzwa ngale indaba uMnu Vundla uchaze ukuthi ucabangela ukuthi umuzi wakhe utshiswe nguDalani Moyo ngoba bexabane bebanga inkomo.
“Ngokubona kwami uMoyo nguye olesandla kulokhu okungehleleyo ngoba ngoLwesihlanu emini saxabana kakhulu ngemva kokuba inkomo zami zingene emasimini akhe.
“Ekuxabaneni kwethu wathi ngizabona, kakupheli amalanga amabili ngingabonanga. Lokhu osokwenzakele kutsho ukuthi yikho abethi ngizakubona,” kutsho uMnu Vundla.
UMnu Vundla wengezelele wathi okumangalisayo yikuthi umuntu abamcabangela ukuthi watshisa umuzi wabo kubikwa wagada ibhasi mhla kusenzakala isiga leso ntambama.
“Isimanga engilokhu ngilaso yikuthi umetheswacala sathi simdinga sezwa kuthiwa uhambe ngebhasi yantambama ngelanga kusitsha umuzi wami okusuka kubenzima ukuthi kungaba nguye njani njengoba ibhasi idlula ngama-9 ntambama thina satshiselwa ngama-11 ebusuku,” kutsho uMnu Vundla.
UNkszn Mpala uthe bancedwa nguNcube mhla kusitsha umuzi wabo ngoba bona babengezwa lutho.
“Isiga lesi sisenzakala thina sasilele okutsho ukuthi aluba kungasiNcube sasizafela endlini lomkami. Ngamangala sengibona sokukhanya endlini lomnyango suvulekile. Savuka saphaphatheka sehluleka ngitsho lokukhipha impahla zakhitshwa nguNcube. Ngilapha nje lokhu ngithithibele ngoba saphosa safa lomkami,” kutsho uNkszn Mpala.
Imizamo yokukhulumisana lometheswacala yehlule ngoba ucingo lwakhe lwalile ukungena.
Usobhuku wakule indawo uMnumzana Silas Sibanda ebuzwa ngale indaba uvumile ukuthi uyayazi.
“Indaba yokutshiselwa kukaVundla endlini ngiyizwile njalo ngihambile ngayabona indlu etshileyo kodwa akukacaci ukuthi ngubani olesandla kucala leli kungakho lokhu sisadingisisa,” kuphetha uMnu Sibanda.
