Uncategorized

Utshiselwa endlini kubangwa umbheda lekhabothi

23 Sep, 2021 - 00:09 0 Views
Utshiselwa endlini kubangwa umbheda lekhabothi

uMthunywa

Leonard Ncube
KULENDODA yeVictoria Falls efe ngemva kokutshela endlini okucatshangelwa ukuthi ingabe itshiswe ngabangane bayo kubangwa umbheda lekhabothi.

UInnocent Mulima (35) okade ehlala eLupunyu duzane legceke lendizamtshina leVictoria Falls ubhubhe kuviki ephelileyo ngenxa yokulimala okwabangelwa yingozi yomlilo emzini wakhe ngenyanga kaNtulikazi.

Ubelokhu elalisiwe esibhedlela seVictoria Falls amanxeba omlilo ebhibhidla okubangele ukubhubha kwakhe.

Umlilo owamemetheka endlini yakhe yokulala kubikwa watshisa yonke impahla egoqela umbheda lekhabothi akunikwa ngumlungu ake amsebenzela kuminyaka edluleyo.

Kubikwa abanye ayesebenza labo abazange bekuthakazelele ukutshiyelwa kwakhe limpahla.

Lokhu kwenza izakhamizi zicabangele ukuthi ukufa kwakhe bekungasiyo ngozi.

Laye umuyi ngesikhathi esesibhedlela kubikwa utshele amapholisa ukuthi ngaleso sikhathi ehlaselwa ngumlilo, wezwa ilizwi lomuntu amaziyo litshotshozela phandle ukuthi kufanele afe.

Isikhulumi samapholisa eMatabeleland North uInspector Glory Banda utshele iphephandaba likazulu ukuthi amapholisa ahlezi phezu kwayo indaba ezama ukuphenyisisa lokuthungatha imbangela yomlilo.

“Sisadingisisa ngaloludaba ngoba kulokusoleka ukuthi kukhona okunuka santungwana,” kutsho uInsp Banda.

Imuli kamuyi layo ithi iyafisa kudingisiswe ukuthi engaba ngubani owaqala umlilo.

Umfowabo uMnumzana Kenneth Zulu uthi imuli ibuhlungu ngendlela umuyi abhubha ngayo ngoba amanxeba ayebhibhidla njalo esephuma impethu ngesikhathi esesibhedlela.

“Ubehlala yedwa emzini wakhe eLupinyu lapho ayeyakhe khona kubomalume. Umfowethu ufe elokhu ehlaba umkhosi ethi ngabe uyasila ayebona lumuntu owabangela umlilo amhlawule nxa kuyikuthi wamonela. Wayehlala ethi akakwazi ukuthi bambulalelani.

“Yebo kuyavela okunengi okunye yikuthi kuthiwa kulempahla ayiphiwa ngumlungu abanye bakhe bazonda ngakho.

Thina njengemuli ngeke sitsho okunengi, sizalinda amapholisa,” kubika uMnu Zulu.

Uthe imuli kayimazi umsolwa kodwa umuyi wabikela amapholisa wawanika ibizo.

Ngesikhathi elalisiwe esibhedlela umuyi, kubikwa wacela izihlobo zakhe ukuthi ziyekhangela ukuthi umbheda wakhe lekhabothi kusakhona engazi ukuthi konke kwatshabalala.

Laye kubikwa ufe engazi ukuthi waphuma njani emlilweni.

Ngemva kokufa kwakhe, amapholisa ahambisa isidumbu koBulawayo ukuthi siyehlinzwa ukuze kuncedise ekuphenyisiseni ngaloludaba.

Umuyi ungcwatshwe ngoMgqibelo eChisuma, duzane leVictoria Falls.

Izakhamizi zithi ziyasola kakhulu ngoba zicabangela ukuthi umuyi watshiswa ngabangane bakhe.

USobhuku weChisuma uMnu Lawrence Tshuma ucele amapholisa ukuthi enze konke okusemandleni awo ekudingisiseni ngaloludaba.

Share This:

Sponsored Links