uMthunywa
KULENINA elithe lifika endlini livela zijabulela labangane balo ngoMgqibelo phakathi kobusuku lathola indlu yalo itshisiwe!
UTsepang Letsoane oleminyaka yokuzalwa engu-42 ohlala eTshepong phase 2 indawo ese Vaal eSouth Africa ubikele iphephandaba leDaily Sun ukuthi ucabangela ukuthi itshamali yakhe yiyo etshise indlu yakhe ngenxa yobukhwele.
Uthe isithandwa sakhe silobukhwele obesabekayo, kodwa izinto ziqale ukuba zimbi ngemva kokuba yena eqale ukuba lilunga lelinye ibandla lezombangazwe.
“Izinto ziqale ukungibhedela ngoba sengiqale ukuya emihlanganweni yezombangazwe.
“Bengithi nxa ngifika endlini angibuze ukuthi bengisenzani emhlanganweni njalo lobani. Lokhu ngahle ngakubona ukuthi kubangelwa yibukhwele nje.
“Wayekhonona njalo ngempahla engizigqokayo ethi akumelanga ngigqoke impahla ezibambayo kumbe amabhulugwe,” nguLetsoane lo.
Uthe itshamali yakhe le akade ehlala layo endlini yakhe yacina ithutha ngenxa yokungezwani kwabo lokuhlala besilwa.
“Wathutha ngemva kwesikhatshana ngoba singezwani wayahlala lomalume wakhe.
“Ngenxa yokuthi wayetshiye impahla zakhe kimi wayezivakatshela santando nje. Ubuyile njalo ngempelaviki wazongivakatshela wasuka ethi uzaphenduka,” nguLetsoane lo.
“Ngemva kokusuka kwakhe ngiphumile lami ngisiyavakatshgela abangane bami wathi efika endlini wangithola ngingekho, ngabona lokhu yikho okumcaphulileyo, inhlanhla nje yikuthi akula muntu akade esendlini ngesikhathi etshisa indlu,” nguLetsoane lo.
Isikhulumi samapholisa akule indawo uConstable Maria Maketekete uthe bawutholile umbiko wenina elitshiselwe indlu njalo basalicubungula icala leli.
“Akulamuntu obotshiweyo kodwa sisayidingisisa lindaba,” kuphetha u-Const Maketekete. — Ubulembu
