uMthunywa
KULENDODA yelizweni leGermany elumathise intombi yayo ekhulelweyo ngoba isesaba isondlo.
U-Eren Toben (20), uhuge intombi yakhe uMaria Peiner (19), baya lapho okulezigodo ngaphandle kwedolobho leBerlin encediswa ngumngane wakhe uDaniel Mueller.
Ngemva kokuqamba amanga athi bayathenga impahla zomntwana ababili laba bagodle intombi le bamhlasela ngogodo, bamgwaza ngengqamu andubana bamthele iphethulo basebemlumathisa.
Inkundla izwe ukuthi uMaria ubesekhulelwe inyanga eziyisificaminwe mibili njalo ubekhangelele ukuba ngumama.
Kubikwa ngenyanga kaZibandlela nyakenye uToben wesaba umlandu wokuba ngubaba wengane wasebopha iqhinga lokubulala intombi yakhe.
Kusenjalo kulosane oluleminyaka emine olugwetshelwe ukuyahlala entolongweni impilo yalo yonke ngemva kokutholakala lulecala lokubulala lungaqophanga.
Abakhokheli belizweni leEgypt bakhiphe umbiko othi umsolwa waphatheka kumvukela eyingozi kuminyaka emibili edluleyo — usane lolu luleminyaka emibili.
Umthethwandaba weWestern Cairo uzwe icala losane lolu obelukuluhlu lwabetheswa icala lokubulala, ukuphazamisa ukuthola kanye lokubhidliza impahla yelizwe.
Isikhulumi sebutho uColonel Mohammad Samir uvumile ukuthi isigwebo lesi sibe liphutha.
Kubikwa iphutha leli libangelwe yikuthi ibizo losane lolu lifana xathu lolomfana oleminyaka engu-16 obekumele athole isigwebo lesi, kutsho umbiko weBBC.
Ebhala kuFacebook uCol. Samir uthe uAhmed Mansoir Qurari Sharara nguye umetheswacala akade behlose ukuthi bamethese amacala la.
Akukaziwa ukuthi kuzakwenziwani ngojaha lo. — Ubulembu
