uMthunywa
Thokozile Mbedzi
LOKHU bekhakhamele omakorokoza besigabeni seMtshede New Line eSigodini ngemva kokuba omunye wabo etshele phakathi komkhukhu wakhe kuviki ephelileyo.
UBusani Ngwenya oleminyaka yokuzalwa engu-46 obesebenza eSeranhill 33 Mine uthe etshayisa emsebenzini bayakwejisa lomngane wakhe emavinkilini eSigodini lapho abaphenduka khona ebusuku bafika babasa umlilo ngemva komkhukhu kaNgwenya bapheka kodwa balibala ukuwucitsha sebeqedile bayalala.
Ekuseni elinye inina lathi lisedlula labona umkhukhu usitsha njalo usuwela phakathi.
Omunye walabo ababone inkemenkeme le uNkosazana Carolyn Sibanda uthe kabalamandla ngengozi le.
“Siphelelwe ngamandla silapha, uNgwenya utshele phakathi komkhukhu wakhe elele. Lokhe sibuzana ukuthi kuhambe njani ubuthongo bakhona bebumbambe njani engazange ezwe lokutshisa nje ukuthi aphaphame.
“Abantu bonke bethukile ngalesi sehlakalo njalo sesibonga inina leli ebelisedlula ngoba kutsho ukuthi ubezakutsha abe ngumlotha kungelamuntu ombonayo,” kutsho uNkszn Sibanda.
Kubikwa indaba le yabikelwa amapholisa lawo ahle aphanga afika endaweni le.
Isikhulumi samapholisa uInspector Loveness Mangena ebuzwa ngodaba lolu uvumile wathi solufikile ehofisini labo ngakho uzulu kananzelele ingozi ezifana lalezi.
“Uzulu kumele ananzelele ukuze ingozi ezifanana lale zingenzakali sicine silahlekelwa yimpilo.
“Sithanda ukuxwayisa uzulu ukuthi kazame ukwenqabela ingozi ngaso sonke isikhathi,” kuphetha uInsp Mangena.
