uMthunywa
Cornelius Luphahla
KUDABA olusemilonyeni yezakhamizi esigabeni seSiphezini bucwadlana ledolobho lakoBulawayo kulesinye isakhamuzi esiphendukelwe sabhuqwa yindwangu yelifa ebesiyifuyile nanko phela silokhu silalisiwe esibhedlela seUnited Bulawayo Hospital ngemva kokwephuka inyonga leqolo.
Udaba lolu olusansumansumane kunathiswana ngalo itiye esigabeni lesi njalo izakhamizi zikholwa ukuba indwangu le kaMnumzana Ganizani Phiri iyaphenduka njalo ibe yinyoka.
Isiga lesi senzakale kuviki ephelileyo.
Kubikwa ngelanga lesiphithiphithi lesi uMnu Phiri walaywa ngo-tsikamutanda ukuthi adilize indlu lapho ayefuye khona indwangu le ayitshiyelwa nguyise kodwa wala.
Kucatshangelwa ukuba indwangu le uMnu Phiri ubeyisebenzisa ukubulala inkomo zezinye izakhamizi kanye lokutshontsha imali ezitolo.
UMthunywa uxhumane loMnumzana Stephen Mkhwebu oyisakhamuzi sakule indawo waveza ukuthi babona ibhayisikopo yamahala indwangu le ibhuqa umnikazi.
“Mina ngazibonela ngawami amehlo kangizange ngitshelwe njalo selokhu ngathwetshulwa yingwe kangikaze ngikubone okufana lalokhu engakubona koPhiri.
“Indwangu le yayiphakathi endlini yamatshe sabona isiphenduke yaba yinyoka ngesikhathi silunguza ngefasitela.
“Ngemva kwalokho sezwa ilizwi lisithi ‘kangiphumi lapha nxa kungadilizwanga indlu le nxa kunjalo ngizafa loyedwa’,” kulandisa uMnu Mkhwebu.
Uqhubekele phambili esithi bathi besizwa lelo lizwi kakho owaba lesibindi phakathi kwezakhamizi ukuthi aqhubekele eme khonapho eduze.
“Sisizwa lelolizwi sacela ezinyaweni sayamela buqamama lomuzi kaPhiri. UPhiri yena wala ukuthi indlu le idilizwe ethi wayitshiyelwa nguyise njalo igcine impahla zamadlozi okwabangela ukuthi abaphurofethi laba bayitshiye bahambe,” kutsho uMnu Mkhwebu.
UMnu Mkhwebu uqhubekele phambili wathi ngemva kwalokho bezwa sokuthiwa uPhiri usele wangena endlini yendwangu le yamtshaya yamephula.
“UPhiri kukhanya wasala engena endlini yendwangu yakhe le yamtshaya yaze yamephula. Basuka-ke abaphurofethi bayalwisana layo baze bayibamba bayikhuphela phandle.
“Sebeyikhiphile yaqala iyinyoka bayifafaza ngemthandazo yabo yaphenduka yaba yinkalakatha yendw- ke bayayitshisa sonke sikhangele noma nje umnikazi wayo wayesethwalelwe esibhedlela seUnited Bulawayo Hospital,” kutsho uMnu Mkhwebu.
UNkosazana Sandile Mafu oyisakhamuzi sakule indawo uchaze ukuthi abaphurofethi bathi indwangu le yatshiywa nguyise kaPhiri.
“Abaphurofethi laba bekhipha indwangu le bathi uPhiri wayitshiyelwa nguyise laye wavuma wathi wayengazi ethi utshiyelwe impahla zamadlozi. Waveza ukuthi indwangu le ibisibangela ukungezwani emulini yabo.
“Wabuya wathi uyabonga kakhulu ngoba abaphurofethi sebemncedile noma nje isimephulile,” kutsho uNkszn Mafu.
Omunye walaba baphurofethi abakhipha indwangu le ebuzwa ngale indaba uvumile ukuthi yenzakala wathi kunengi abakukhiphayo emizini yabantu.
“Kuliqiniso ukuthi sakhipha inyamazana kwesinye isakhamuzi kodwa ngeke ngichaze okunengi ukuthi kwahamba njani, kungcono liyekudingisisa lapho eyaphuma khona,” kutsho uMnu Siziba.
Imizamo yokukhulumisana loMnu Phiri yehlule ngoba ucingo lwakhe lwalile ukungena njengoba kuthiwa ulalisiwe esibhedlela.
UMthunywa uphinde njalo wakhuluma lendodana kaMnu Phiri yaveza ukuthi ngeke ikhulume lutho ngale indaba.
“Mina ngeke ngikhulume lutho ngale indaba kangiyazi njalo kangazi ukuthi inombolo zami zocingo uzithethe ngaphi lani kangilazi,” kutsho umntakaPhiri equma ucingo.
