uMthunywa
Thando Dube
KULENDODA yakoBulawayo elokitshini lePumula egwetshwe ukuvalelwa ejele inyanga ezingu-14 kulandela ukutholakala ilecala lokutshaya omunye ngesipanela.
UAndrew Mabena oleminyaka engu-33 yokuzalwa umiswe emthethwandaba weWestern Commonage kuviki edluleyo esetheswa icala lokutshaya uSikhumbuzo Mandiopera oleminyaka engu-45 yokuzalwa ngesipanela kanye le-garden fork elenhloso yokumlimaza.
Umtshutshisi uMnumzana Brian Nkala ubikele inkundla ukuthi mhlaka 22 Nkwenkwezi ePumula Beer Garden, umetheswacala wathatha inhlanzi kanye lotshwala bukaMandiopera ongumamangala.
Umamangala wathi embuza ukuthi kungani ekwenza lokhu umetheswacala wamphakamisa ngeyembe wadobha i-garden fork watshaya umamangala yena owathi ebona sokuliwa waphunyuka wabaleka.
Umetheswacala wamhlala izithende wamjikijela ngesipanela okwabangela ukuthi umamangala awele phansi alimale.
Ngalesosikhathi umetheswacala wadobha ilitshe ezama ukutshaya umamangala kodwa abantu ababelapho bambamba wasebotshwa.
Ebuzwa ngecala leli umetheswacala uvumile ukuthi walenza.
Ngemva kokulalelisisa icala lokuhluzisisa ubufakazi, umantshi uMnumzana Stephen Ndlovu uqume ukuthi umetheswacala avalelwe ejele okwenyanga ezilitshumi lanhlanu, eziyisithupha zakhutshwa ngesizatho sokuthi umetheswacala uziphathe kuhle. Ezinye eziyisitshiyagalo mbili zesulwa kukhangelelwe ukuthi umetheswcala enze i-community service okwamahola angu-280.
