uMthunywa
Thokozile Mbedzi
ZILOKHE zibabaza izakhamizi zeCollen Bawn eGwanda ngemva kokuba enye indoda igande enye ngembokodo yelitshe yafa kubangwa umngane.
UHerbert Jamara oleminyaka engu-19 kubikwa uxabane loAbel okungasatholakalanga isibongo sakhe, ngoMgqibelo kuviki ephelileyo.
Kuvele ukuthi uJamara wayelokhu etshaya uAbel kodwa engambiseli okuyikho okwenza uKudakwashe Dube (34) wacina engenela indaba le ngoba ethi ngeke ekele umfowabo abavela bonke eGokwe etshaywa.
Ekhuluma lentatheli kaMthunywa uMnumzana Bhekithemba Moyo uthe uDube loJamara bathi sebesilwa balanyulwa ngabantu kodwa uJamara kazange akuzwisise lokho ngoba wasuka wahamba wabuya esekhanda uDube ngamatshe ekhanda okuyikho okwabangela ukufa kwakhe.
“Lokhe sithithibele silapha ngesiga esenzakale lapha. UHerbert waxabana loAbel esithi akalamandla yikho enatha utshwala kakhulu ngoba uzama ukuthi aqine njengaye.
“UHerbert waqhubeka elokhu etshaya uAbel okwenza uKudakwashe wangenela. Ekulweni kwabo uHerbert lo Kudakwashe abantu babalamula. UHerbert wahamba yikho ukuyadobha kwakhe imbokodo yelitshe wayatshaya uKudakwashe esiphundu okwabangela ukuthi awele phansi.
“Abantu bazama ukumthwalela esibhedlela kodwa wabhubhela khona,” kutsho uMnu Moyo.
UMnu Moyo uqhubekele phambili esithi njengezakhamizi bamangaliswe yisibindi sikaJamara sokwenza isenzo esinje.
“Isibindi sikaHerbert sokubulala umuntu omdala kulaye khatshana siyethusa. Asazi ukuthi ungenwe yini kumbe njalo yikuhlungwa,” kutsho uMnu Moyo.
Isikhulumi samapholisa esabelweleni seMatabeleland South uInspector Philisani Ndebele ebuzwa ngodaba lolu uvumile wathi solufikile ehofisini yakhe.
“Udaba lwamadoda abulalane ngelitshe solufikile ehofisini yethu njalo sisaluphenyisisa,” kuphetha uInsp Ndebele.
