uMthunywa
Cornelius Luphahla
KUDABA olusendebeni zezakhamizi zesigabeni seMazizini eLupane kulesakhamizi esatshontsha inkomo zesinye isakhamuzi sazithengisa esimangalise abantu sesisithi sihlatshwe zinkomo esazitshontshayo eguswini.
Isakhamuzi lesi uZibonele Ngwenya kubikwa esetshontshe inkomo zikaNdlovu kazange ambophise kodwa wamtshela ukuthi uzazibonela kungakho watshaywa lizulu elusile, wafelwa zinkomo ezintathu.
UMthunywa ukhulumisane lesinye isakhamuzi sakule indawo uMnumzana Thamsanqa Ndlovu wachaza ukuthi indaba le uyayazi njalo okwalimazisa uNgwenya yibusela.
“Indaba le ngiyayazi lami njalo uNgwenya watshontsha inkomo zikaNdlovu ezintathu ngoMpalakazi kumnyaka ophelileyo wayazithengisa kodwa zabaleka zaphenduka.
“Ngemva kwalokho ababezithengile bazilandela uNdlovu wafika wabapha imali yabo kodwa kazange ambophise wathi uzabona.
“Kuthe ngoZibandlela uNgwenya watshaywa lizulu ehamba lenkomo zakhe kwafa ezintathu yena walimala wayasilela ebantwini. Kuthe kungakedluli nsuku ezingaki esilile sezwa kuthiwa utholakale eguswini ehlatshwe zinkomo zamtshiya usebangwa lezibi,” kuchaza uMnu Ndlovu.
“Isimanga yikuthi inkomo lezo ezamhlabayo yizo okuthiwa wayezitshontshile njalo zabalandela ababemthwele zaze zayafika emzini wakhe lakhathesi lokhu zibonakala kule indawo noma nje zingezakhatshana,” kulandisa uMnu Ndlovu.
UMnumzana Mloyiswa Ncube ongumalume kaMnu Ngwenya ubikele intatheli ukuthi kalankani ngesiga lesi esehlele umzukulu wakhe.
“Lokhu ngathwetshulwa yingwe angikaze ngizibone inkomo ezenza njengaleziya. Lami ngathi ngizidingela inkomo zami eguswini ngezwa umsindo wenkomo zibongolela ngagijima ngayakhona ngathola setshudule sokungokunye umzukulu wami esecatshe ngaphansi kwesigodo ngapho sezimephule ingalo,” kutsho uMnu Ncube.
Uqhubekele phambili njalo wachaza ukuthi wathi ezama ukuzixotsha zabongolela ngamandla sezifuna ukumhlaba.
“Ngathi ngizama ukuzitshaya inkomo lezi zangilanda sezifuna ukungihlaba ngaze ngakhwela esihlahleni. Ngemva kwalokho ngamemeza abantu kwaze kwabuya abanye abafana ababedinga inkomo sancedisana ukuxotsha inkomo lezi.
“Ngasuka lapho ngathuma omunye walababafana wayabika ekhaya babuya ngenqola sazomthwala samusa esibhedlela. Inkomo lezi zasilandela zibongolela zaze zayafika ekhaya, lakhathesi lokhe zingakasuki ekhaya ungaze uzixotshe ziyaphenduka,” kutsho uMnu Ncube.
Udadewabo kaMnu Ngwenya uNkosazana Sindiso Ngwenya ebuzwa ngale indaba uchaze ukuthi ubuhlungu kakhulu ngesiga esehlela umnewabo.
“Mina angilamazwi ngalokhu okusehleleyo njengemuli njalo abantu balamanga ukuthi umnewethu watshontsha inkomo. Ngeqiniso abantu bayamqambela nje benzela ukumloya kuphela yena engelacala.
Ngokubona kwami inkomo lezi kayisizonkomo nje, ngezomuthi,” kutsho uNkszn Ngwenya.
Usobhuku wakule indawo uMnumzana Gilbert Ngwenya ebuzwa ngale indaba uvumile ukuthi uyayazi.
“Indaba yokutshaywa lizulu kukaNgwenya lokuhlatshwa zinkomo zakoNdlovu ngiyayazi ngakho noma nje engumfowethu kangizange ngizwe ukuthi nguye owayetshontshe inkomo zikaNdlovu ngoba uNdlovu laye kakhulumanga ukuthi zazitshontshwe ngubani, wathi ozithetheyo uzazibonela kuphela,” kuphetha uMnu Ngwenya.
