uMthunywa
Bongani Ndlovu
KULAMAJAHA amabili esigabeni seFort Rixon bucwadlana leShangani amiswe phambi komthethwandaba weTredgold esetheswa icala lokubulala umngane wabo kubangwa ukuthi wabheja ngempondo edabukileyo emakhasini.
Umantshi uNkosikazi Ulukile Muleya-Ndlovu uzwe ukuba mhlaka 9 Mfumfu kuwonalo umnyaka abasolwa uThokozani Nkomo (19) ohlala eLuhlankomo Village eMatobo loNyasha Muzinga (26) weMpopoma baxabana lomufi uQhubekani Moyo kubangwa ukuba kungani ekhiphe i$2 edabukileyo ebheja amakhasi.
Umantshi uzwe njalo ukuthi ngalelolanga amapholisa amukela umbiko wokuba kulomuntu otshayiweyo. Ekufikeni kwawo athola uMoyo esefile okwacina kubangela ukuba bavule icala lokubulala.
Kubikwa sokuvulwe icala leli, amapholisa ekuchwayisiseni kwawo ezwa ukuba uThokozani Nkomo loNyasha Muzinga yibo abatshaya babulala umuyi kubangwa impondo edabukileyo. Ngemva kokulandela umkhondo lo bathola impahla zabasolwa zilegazi yikho okwabangela ukubotshwa kwabo.
Kuzwakale njalo ukuthi isimo sikamuyi ngesikhathi amapholisa efika sasizwisa usizi ngoba wayetshaywe okwenyamazana ngoba wayebhulwe ngezigodo, wakhandwa ngamatshe kanye lembokodo okwatshiya isidumbu siphakathi kwegazi.
Umantshi udlulisele phambili ukuthoniswa kwecala leli njalo abasolwa bazavela ejele.
Umtshutshisi wecala leli bekunguMnumzana Mufaro Mageza.