uMthunywa
Thando Dube
KULOMABHALANE wekolitshini yeHavara eselokitshini leNketa koBuluwayo omiswe phambili komthethwandandaba eWestern Commonage esetheswa icala lokutshayela esikhewini imali yemihloliso ye-O-level yabafundi.
UTaitos Chikonzo oleminyaka yokuzalwa engu-25 ohlala elokitshini leMpopoma ubotshwe ngemva kokuthatha i$260 eyabhadalwa ngabafundi ababili yokubhala imihloliso ye-O-level wayitshayela esikhewini okubangele ukuthi abafundi laba behluleke ukubhala imihlolisi lonyaka.
Umtshutshisi uNkosazana Margaret Takawira ubikele inkundla ukuthi mhlaka 11 Nkwenkwezi, abafundi ababili beHavara College banika umetheswacala i$260 kuyimali yokubhala imihloliso yeO-level ukuthi ayebabhadalela ePremier High School isikolo ababezabhalela kiso.
Umetheswacala kazange akwenze lokhu wathatha imali wazisebenzisela.
Ngokuya kwesikhathi uyise wabafundi laba uMnumzana Munyaradzi Webster wananzelela ukuthi uTaitos Chokonzo wayengazange abhadalele abantwabakhe imali yokubhala wasemangala emapholiseni okwenza ukuthi umetheswacala abotshwe.
Ebuzwa ngecala leli umetheswacala uvumile ukuthi wakwenza wasesithi uzimisele ukubhadalela abafundi laba imali yesikolo kuze kufike isikhathi lapho abazabhala khona imihloliso, uzabhadala imali yokubhala imihloliso njalo uzabanika lemali yokugada umtshova.
Ngemva kokuthoniswa kwecala leli umantshi uMnumzana Lungile Ncube uqume ukuthi umetheswacala avalelwe ejele okweminyaka emithathu yona esulweyo kukhangelelwe ukuthi umetheswacala angenzi icala elifanayo kuminyaka emithathu elandelayo.