uMthunywa
Cornelius Luphahla
IZAKHAMIZI zesiqintini seParadise eNyathi zicelana isawudo ngendaba yomdeni wakoNdlovu okubikwa kuhlala kusitsha izindlu kokuphela kungaziwa ukuthi zitshiswa ngubani okwenza bacabangele ukuthi omunye oyingxenye yalo umdeni usehlamukelwe ngondofa bakhe okuyibo abatshisa izindlu.
Imbedumehlwane le kubikwa yenzakala emzini kaBertina Sibanda, Khulekani Ndlovu kanye loka Emelia Tshuma njalo iqale ukwenzakala lonyaka ngemva kokuba abomdeni lo bale ukuhlolwa ngabaphurofethi ababekule indawo bethi bangamaSabatha.
UMthunywa ukhulumisane loMnumzana Leonard Mbambo oyisakhamuzi sakule indawo wathi ukutsha kwezindlu kwaqala emzini kagogo wakulo umdeni njalo kukhanya ondofa laba ngabakhe.
“Ukutsha kwezindlu lokhu kwaqala ngoMbimbitho koNaViola odume ngokuthi nguGogo uMaSibanda. Thina sathi sivuka ekuseni sezwa sokuthiwa kulesiphala esitshileyo koMaSibanda kodwa akwaziwa ukuthi sitshiswe ngubani.
Kwasimangalisa singazi ukuthi asikaboni kuyeza okukhulu.
“Kuthe kungakapheli iviki sezwa sokuthiwa kutshe umbheda endlini abantu bephandle akubonakalanga ukuthi utshiswe yini. Lapho sahle sabona ukuthi indaba isekhaya,” kutsho uMnu Mbambo.
UNkosazana Sabelo Siwela oyisihlobo somdeni wakoNdlovu ubikele intatheli ukuthi okwenza kwatsha izindlu yikuthi umdeni wakoNdlovu wala ukuya kubaphurofethi bethi bayakhonza.
“Ukutsha kwezindlu lokhu kwaqala ngemva kokuba abakoNdlovu beyale ukuyahlolwa ngabaphurofethi ababekule indawo bathi bakhonza iSabatha ngakho abavunyelwa. Kuthe kunjalo abaphurofethi baveza ukuba olabondofa kodwa eyale ukuzokhitshelwa bazamhlamukela. Ngemva kwenyanga behambile zaqala ukutsha izindlu koNdlovu sokuze kulamuhla.
“Okungimangalisayo yikuthi uGogo uMaSibanda ubize abaphurofethi emzini wakhe kuphela wangabikeli abanye khonapho kunguye okuthiwa ulabondofa laba. Noma nje ebabizile kuthe ngemva kwalokho kwatsha umkulu wakhe okuchaza ukuthi abasebenzanga lutho,” kutsho uNkszn Siwela.
Esinye isakhamuzi sakule indawo esiziveze ngokuthi nguMaNkonjeni sichaze ukuthi mhla kusitsha omunye umuzi wakoNdlovu sasikhona njalo asilankani ngakho.
“Mina mhla kusitsha umuzi kaKhumbulani Ndlovu ngangikhona ngakho angilamathe ngoba indlu yaphongukutsha nje kungelamuntu phakathi. Ithe ngemva kokuphela kwayo kwaqala enye sazama ukuyicitsha kodwa sehluleka.
“Okwababuhlungu yikuthi akulampahla eyaphumayo ngoba umlilo lo wawuvutha kakhulu. Kuthe kunjalo uKhulekani wahle wangasabuyi ekhaya wathatha umkakhe bayahlala kweleSouth Africa okuyikho abakhona lakhathesi,” kulandisa uNkszn Nkonjeni.
UNkosazana Emelia Tshuma ongunyanewabo kaGogo uMaSibanda uveze ukuthi uzwa ubuhlungu ngokutsha kwezindlu zakhe ngoba kwaphelela impahla zakhe phakathi.
“Mina ngatshelwa yizindlu ezimbili ngakho ngizwa ubuhlungu kakhulu ngoba ngaphelelwa zimpahla zonke.
Okwakuqala indlu yatsha ngingekho ngathola kuthiwa kutshe kanye lempahla zonke. Kuthe kunjalo kwatsha eyesibili abantwana belele phakathi baphosa balobela phakathi.
“Kweyesibili lakho akulampahla ezaphumayo konke kwatshela phakathi. Okubuhlungu njalo yikuthi kangikwazi ukuthi izindlu zitshiswa yini njalo ngiswele ukuthi ngingalungisa ngani. Ukuthi kwabuya abaphurofethi lapha bezolungisa ayisikho ngoba babizwa ngunyanewethu kodwa thina kasibizanga njalo kasibikelanga ngakho,” kutsho uNkszn Tshuma.
Ebuzwa ngale indaba uNkosazana Sibanda uvumile ukuthi izindlu zakhe zatsha kanye lemibheda wala ukuthi ondofa abatshisayo ngabakhe.
“Kuliqiniso sibili ukuthi emzini wami kwatsha indlu lesiphala singazi ukuthi kutshiswa yini. Kwathi ngemva kwamalanga athile kwatsha umbheda phakathi endlini khonapho kungelamuntu. Akuhlalanga nsuku ezingaki kwatsha njalo omunye umbheda endlini kwacina ngokutsha iwodirobhu. Konke lokhu kwakusenzakala singazi lokuthi ngubani okwenzayo.
“Ukuthi ondofa abatshisa lapha ngabami angikwazi njalo abantwabami babiza abaphurofethi ukuthi bezolungisa kodwa kukhanya kwasilela ngoba ebusuku kukhona okungikhathazayo. Ngikhuluma nje kucine kunyanga ephelileyo ukutsha kwendlu,” kuphetha uNkszn Sibanda.
