uMthunywa
Nomthandazo Ndlovu
KULEJAHA lesigabeni seSelonga eGwanda elinathe idibha lafa ngemva kokuthenwa ngepintshisi ngamanye amajaha kubangwa intombi.
Lesisiga esitshiye izakhamizi zithithibele ukuthi kambe umuntu uyathenwa njengenyamazana senzakale ngeviki ephelileyo ngoLwesithathu lapho uMnumzana Omphile Moyo athenwe khona nguProsper loMideous kanye labanye ababili okungasatholakalanga amabizo abo.
Ekhuluma loMthunywa uNkosazana Melusi Nyathi uthe kalankani ngesiga esenzakale kumakhelwane wakhe.
“Abafana laba abathene uMoyo omunye wabo ubefuna intombi kaMoyo, kukhanya umyalile okusuke kwamzondisa yikho ukusuka sethatha abangane bakhe abathathu besiyatshaya uMoyo,” kutsho uMnu Nyathi.
“Sizwa kuthiwa bamtshaye baze bamthena ngepintshisi besithi nguye imbangela yokuthi umngane wabo angakhonjwa, ucine senatha idibha wazibulala,” kuchaza uMnu Nyathi.
Kuzwakale ukuthi ngemva kwamalanga amabili uMnu Moyo ehlaselwe yilaba abathathu unathe idibha wayabhubhela esibhedlela seManama.
“Umuyi unathe idibha ngemva kwamalanga etshaywe ngabafana laba, ubesezibona laye ukuthi kambe seyindoda bani etheniweyo, ugijinyiselwe esibhedlela kodwa akusizanga, wedlula,” kutsho esinye isakhamuzi esingathandanga ukubethwa ngegama.
“Mina angikaze ngikuzwe ukuthi umuntu uyathenwa njengenyamazana, okungethusileyo yikuthi uthenwe ngepintshisi kambe kuyini khonokho, yikho bebalekile abafana laba ngoba bekumele bafele ejele sibili.
Yibunyamazana lobu ababenzileyo,” kuphetha isakhamuzi lesi.
Omele isikhulumi samapholisa esabelweni seMatabeleland South uAssistant Inspector Loveness Mangena uthe abakalwamukeli udaba lolu.
“Besingakawuzwa umbiko wendoda ezibulele ngemva kokuthenwa kubangwa intombi kodwa sikhuthaza uzulu ukuthi nxa kulokungezwani bakhulumisane bakhumisane umlotha kulokucina belimazana,” kuphetha uAsst Insp Mangena.
