uMthunywa
Thokozile Mbedzi
NGENXA yokungafuni ukwaliwa kulenina lelokitshini leLuveve, koBulawayo elidonselwe emthethwandaba weTredgold lisetheswa icala lokugwaza owayengumkalo kanye lokubulala impahla azithengisayo.
UArchiford Ndlovu ongusomabhizimusi ucele incwadi yokumvikela kuCecilia Ngazana (34) ngemva kokumtshaya kanye lokumgwaza ngengqamu.
UNdlovu ubikele inkundla kamantshi ngeviki ephelileyo ukuba uNgazana umenza ahlale ephethe izibindi ngezandla.
UNdlovu uthe uNgazana wayengumkakhe kodwa sebehlukana kodwa ufika nsukuzonke endlini yakhe ezokulwa laye.
“Nkosi, uCecilia uyangena ebhizimusini lami abhidlize e-bottle store ahlukumeze abathengi bacine bephuma kusale kungasela othengayo. Ufika atshayelele amambodlela phansi kufe yonke into ethethisa labathengi ngamagama abuhlungu. Kunginika amahloni njalo kungehlise lesithunzi ngoba izakhamizi lezi yizo ezixhasa ibhizimusi lami,” kutsho uMnu Ndlovu.
“Nkosi, ngicina ngisebenzela ize esebulele utshwala aphinde njalo athathe lokuthengiswayo ahambe lakho.
“Endlini ngingawatsha izigqoko uyazibutha zonke ahambe lazo. Ngathi ngisiyabona abantwana wangithela ngamanzi atshisayo ethi uyangifundisa umthetho ukuthi kuphilwa njani, ufuna ukungiqondisa .
“Kangisakwazi lokuthi ngisebenzelani. Kungakho mhlonitshwa ngicela ukuthi engasafiki ebhizimusini lami lendlini lapho engihlala khona,” kulandisa uMnu Ndlovu.
Umantshi uMnumzana Sheunesu Matova unikeze uMnu Ndlovu incwadi yokumvikela kuNgazana lanxa yena engafikanga emthethwandaba.