uMthunywa
Thokozile Mbedzi
KULOSOMABHIZIMUSI wakoBulawayo omiswe phambi komthethwandaba weTredgold kuviki ephelileyo otholakale elecala lokugcina butshapha umbhobho nanko phela kubikwa ucine ubangela ukuthi isisebenzi sakhe sidlwengulwe yizigebengu ziwusebenzisa.
Umsolwa uPryford Sibanda oleminyaka yokuzalwa engu-49 ohlala elokitshini leLuveve 4 ongumlimi omkhulu ulivumile icala lokugcina butshapha umbhobho.
Umtshutshisi kulelicala uMnumzana Nkathazo Dlodlo ubikele inkundla ukuthi mhlaka 17 kuyonale inyanga umsolwa olombhobho wohlobo lwe-303 wehluleka ukuwubeka kuhle.
Umtshutshisi uveze ukuthi umsolwa watshiya umbhobho lo phezulu egcekeni waya edolobheni okwabangela ukuthi ngemva kokugqekeza kwezigebengu ziwusebenzise ukwethusela isisebenzi sakhe esacina sidlwengulwa.
Kubikwa ngemva kwesehlakalo lesi kwabikelwa amapholisa ayiwo atshayela uSibanda ucingo emethesa icala lokutshiya umbhobho egcekeni.
Umantshi kulelicala uMnumzana Tinashe Tashaya ubuze umsolwa ngecala leli alivumileyo.
“Nkosi ngiyalivuma icala lami, njalo lomthetho wokuthi kumele ngiwugcine njani umbhobho ngiyawazi. Uhlupho yikuthi ngangiyewusa ku-service kodwa ngathola sekuvaliwe.
“Ngenxa yalokhu ngalibala ngasengifika ngiwubeka egcekeni sengigijimela ukuyakwenza okunye edolobheni,” kuchasisa umsolwa.
Kubikwa lezo zigebengu zaphinda njalo zatshontsha impahla ebalisa amakhompuyutha kanye lemali.
Umantshi uthole umsolwa elecala lokugcina butshapha umbhobho wasesithi abhadale i$100 kumbe ayehlala ejele okwenyanga eyodwa.