uMthunywa
Nomthandazo Ndlovu
ZIVUKE ubhedu izakhamizi zeBeitbridge zahlasela omunye usomabhizimusi wakoBulawayo okubikwa ubesehluphile ngokuthenga inkomo ezitshontshiweyo, uMthunywa ukuzwile lokhu.
UMthunywa uzwe ukuthi uVusumuzi Mthophini weJonidipe utshontshe inkomo ezingu-23 wayazivalela kwamanye amasimu esigabeni seTshokotshoko eGwanda lapho akade sekulindelwe ukuthi zizothengwa khona.
Ekhuluma loMthunywa uNkosazana Talent Sibanda uthe kwafika intsha yesigabeni seMasera khonale eBeitbridge idinga inkomo ngoba yayisizwe udletshana lokuthi zitshontshwe nguMthophini.
“Thina sibone nge-truck igcwele intsha yeMasera isithi idinga uVusa (Mthophini) ngoba utshontshe inkomo. Bafica uVusa engekho emzini wakhe kulomkakhe yena owahle wamfonela emtshela ukuthi zimbi indaba,” kuchaza uNkszn Sibanda.
Kubikwa uVusa uthe esizwa ukuthi udingwa ngamehlo abomvu wahle wathi nyawo ngibeletha ngemva kokutshayela usomabhizimusi lo ucingo okwakumele athenge lezonkomo.
“UVusa uthe sezwile ukuthi uyadingwa wahle wafonela umathenga emtshela ukuthi abaleke bayadingwa, yena uthe esuka lapho wabaleka ngemota yakhe, kodwa ngeshwa-ke yayisimhlezi ezithende intsha yeMasera,” kuqhuba UNkszn Sibanda.
Kubikwa uMthophini wehlika emoteni wahle wadliwa ngumswenya. Esinye njalo isakhamuzi esiziveze ngokuthi nguMnumzana Brian Dube sithe usomabhizimusi lo, okutholakale ukuthi nguBright nje kuphela laye esizwa ukuthi uyadingwa wahle wasuka ebusuku emzini ayelele kiwo wadla phansi.
“UBright laye wabaleka kodwa walindela ukugada izimota ekuseni engazi ukuthi uyabe esezithele ezandleni zalabo abavele bemdinga.
UMthunywa uzwe ukuthi usomabhizimusi lo wathi ezama ukungena emoteni ekuseni intsha eyayisemoteni eyayibucwadlana yahle yambhuzela yambhaxabula andubana alanyulelwe lipholisa elalilapho.
Kubikwa usomabhizimusi lo loMthophini usezandleni zamapholisa.
