uMthunywa
Mthokozisi Dube
KULOSOMABHIZIMUSI wesigabeni seTshanke eNkayi obanjwe xhaka lonkosikazi wesinye isakhamuzi, uMthunywa uyakuveza lokhu.
Usomabhizimusi lo okuthiwa nguKnowledge Ncube oleminyaka yokuzalwa engu-34 kubikwa wabanjwa xhaka lonkosikazi kaBlessed Sibanda ligwaze umhlaba bezincindela uluju lwemvelo.
Isiga lesi senzakale emavikini ambalwa adluleyo njalo lokhe siludaba egudwini.
Abafakazi abaxhumane lentatheli yephephandaba likazulu babike ukuba sekulamanina afika phose amahlanu achithelwa imizi nguNcube.
UMthunywa ubikelwe ukuba ababili laba babanjwa xhaka nguMnu Sibanda.
Elinye ipholisa lesigaba elilandisele uMthunywa ngendaba le liveze ukuthi lanxa uSibanda wabona ababili laba bebonke wacabangela ukuthi kwakungumnawakhe.
“USibanda wazibonela ngawakhe amehlo umkakhe ekhohlisana losomabhizimusi uNcube kodwa yena wabona sengathi ngumnawakhe wasenanzelela esefike emzini wakhe.
UMthunywa uzwe ukuthi uSibanda kazange axabane loNcube, waphanga wadlulisela udaba lolu kubakhokheli besigaba bona abahlawulisa uNcube imbuzi ezimbili.
Ebuzwa liphephandaba likazulu ecingweni uNcube ukulandulile ukuthi wabanjwa xhaka kodwa wavuma ukuthi wahlawuliswa imbuzi ezimbili.
“Engingakutsho yikuthi kungamanga ukuthi ngabanjwa xhaka lomfazi womuntu kodwa okuliqiniso yikuthi ngahlawuliswa imbuzi ezimbili. Mina ngingumuntu othetheyo njalo osontayo. Ngangingeke ngenze into enjalo,” kubika uNcube.
