uMthunywa
Ethel Ncube
BAZIDLA izibindi abantu abahlala koMathuphula eTsholotsho kulandela ukubanjwa komunye usobhuku wakhonale yisilwane.
Iphephandaba likazulu lizwe ukuthi uMnumzana Paul Ndlovu wathi ezihambela wahlangana lesilwane kumaviki amabili edluleyo samhlasela satshiya simlimaze inyawo.
Intatheli ixhumane lesakhamuzi sakule indawo uMnumzana Peter Ncube ochaze ukuthi kuMnu Ndlovu kwasebenza amadlozi akibo ngoba isilwane asandisanga ukutshiya umuntu ephila.
“Mina ngahamba ngisiyambona ngemva kokuba esehlaselwe yisilwane sadlempha ubuso samlimaza lenyawo wasala engakhangeleki. Inyawo zombili zazilimele ziphuma igazi kwathi impahla ayezigqokile kangikhulumi zazingasela mbala ngenxa yegazi kodwa ngempela lumuntu abakibo bambona ngoba ngabe lamuhla sikhuluma enye indaba,” kubika uMnu Ncube.
Uqhubekele phambili wachaza ukuthi indlela uNdlovu alwa ngayo yiyo eyenza isilwane singambulali.
“Inyamazana le yayijonge ukumqeda ngoba lapho okwakuliwa khona kwasala kumatshudutshudu. Wasibikela ukuthi yena ubezihambela egangeni esiyadinga inkuni isilwane sathutsha engasilindele sibhonga sahle samhlasela. Uthi kazange abaleke lovalo lwamtshaya kanye wabamba ihloka ngezandla zombili samlanda kunjalo sifuna ukumlahla phansi.
“Nxa wayesitshela yena uthi wenelisa ukuvuka esephansi wadobha isikhali sakhe wasitshaya ikhanda wenelisa ukubaleka esiya ekhaya lapho athi esephela amandla wahlaba umkhosi sagijima sayamkhangela,” kutsho uMnu Ncube.
Ekhuluma lentatheli omunye wezakhamizi uMnumzana Dingindlela Dube uchaze ukuthi kwaba yinhlanhla ukuthi uNdlovu asinde ehlaselwe yisilwane.
“Isilwane samdumela ezihambela egangeni saphosa sambulala kwaba yinhlanhla ukuthi aphephe. Mina ngezwa ngomkhosi sathi sifika lapho ayekhona sambona egcwele igazi emzimbeni wonke ngapha lilokhe ligeleza enyaweni ngoba samqephula inyama enyaweni wasala elesilonda esikhulu. Inyamazana le yabanjwa ngelanga elilandelayo yabulawa yizisebenzi zeMathuphula Game.
“UMnu Ndlovu wathwalelwa ekilinika yakoSipepa lapho abamdlulisela khona esibhedlela seTsholotsho,” kubika uMnu Dube.
UMthunywa uxhumane lalowo owabanjwa yisilwane uMnumzana Ndlovu ochaze ukuthi lokhe emangele ngokwenzakalayo.
“Isilwane lesi sangidumela sibhonga okuzwayo ngezwa ngiphela amandla kodwa kwaba yinhlanhla kangiwelanga phansi. Seza kimi singadlanga nkotshana sifuna ukungidla, okwenzakala lapho kwaba nzima. Engisakukhumbula yikuthi ngadobha ihloka lami ngalwisana laso ngenelisa ukubaleka ngiqonda ebantwini. Bangithatha ngabalandisela okwenzakalayo kodwa sengisiya esibhedlela bathi ngasengisehluleka ukukhuluma ngenxa yokuthi ngangilahlekelwe ligazi elinengi kakhulu.
Engacina ukukuzwa ngabantu bethi zwanini inhliziyo yakhe ukuthi ilokhu isatshaya? Okwakhathesi sengingcono, lokho yinto engingasoze ngiyikhohlwe. Ngasengilunguzile ekufeni kwasiza abakithi,” kubika uMnu Ndlovu.
Ekhuluma loMthunywa uNkosazana Caroline Washaya Moyo oyisikhulumi seZimbabwe National Park Authority ubike ukuba indaba le kayikafinyeleli kuye.
