uMthunywa
YiNtatheli kaMthunywa
ABANTWANA beBinga abaleminyaka yokuzalwa engaphansi kwemihlanu bazathola usizo lokutholiswa incwadi zokuzalwa ama-birth certificate ngemizamo yokwehlisa inani labantwana abaswela incwadi lezi.
Uhlelo lolu luqoqwe yinhlanganiso ezimeleyo iBasilwizi Trust ngemva kokunanzelela ukuba abantwana abangatholi incwadi zokuzalwa lezi sebebanengi esabelweni seMatabeleland North, ikakhulu eBinga.
Inani labantwana elingela ncwadi lezi liyanda ngenxa yezizatho ezehlukeneyo, okudala ukuthi behluleke ukuqhubeka ngesikolo kanye lokuncitshwa amathuba wokuguqula impilo zabo, ukuthola umsebenzi lokuvula amabhizumusi nxa sebekhulile. Isigaba seBinga sisalele emuva kwezempucuko, okuyikhona okwenza kubelabantwana abanengi abangela ncwadi zokuzalwa.
Inhlanganiso yeBasilwizi Trust isungule uhlelo lwayo lwe-Citizens Campaign for Birth Identity Documents (CICABID) oluzasetshenziswa ukuqhuba umsebenzi lo.
Inhlanganiso le ibika ukuba lokhe iqalise uhlelo lwayo, isincede abantwana abafika amakhulu amabili.
Kumbiko othunyelwe intatheli, umqondisi weBasilwizi Trust uMnumzana Christopher Mweembe uthe bathola ukuba kulesilinganiso se-43% sabantwana abangela ma-birth certificate emaphandleni aseduzane lomfula uZambezi.
“Inhlanganiso yeBasilwizi Trust yahlaziya indawo yeBinga ngomnyaka ka-2017 yathola ukuba i43% yabantwana ayilazo lezi ncwadi.”
Uthe uhlelo lwabo lukhangelele ukuthi lwehlise inani leli kusiyafika umnyaka ka-2022.
Ngaphandle kwesigaba seBinga, ezinye indawo okulodubo lwencwadi zokuzalwa zibalisa iTsholotsho, Kezi, Nkayi, Hwange, Plumtree, Matobo lezinye ikakhulu eMatabeleland.
