uMthunywa
KULABAFUNDI ababili abakuGiredi 4 esikolo seMahlathini Primary elokitshini leCowdray Park abafe ngesikhathi bebhukutsha phakathi kwechibi elagejelwa ukufaka amatanka amafutha ezimota izolo (ngoLwesithathu) emini. Kubikwa abantwana laba bebebhukutsha bebahlanu ngemva duzane lesitolo sakoTM ngesikhathi kusenzakala ingozi le.
Kubikwa abafana abathathu benelisile ukuthola usizo baphuma phakathi kwechibi leli eligcwele udaka, ngokuswelakala kwenhlanhla ababili behluleka bahle baphelela khonapho.
Esinye isakhamuzi esithande ukuqanjwa ngelokuthi Nkosikazi Mutemi nje kuphela sithe ingozi le yethuse wonke umuntu elokitshini.
“Lokhu okwenzakeleyo kusitshiye sidanile kakhulu njengazakhamizi.
“Abantwana laba batshayise esikolo beyisixuku baqonda echibini leli abahlanu bangena emanzini. Akukacaci ukuthi kwenzakeleni sibili kodwa kukhanya amanzi la alodaka okwenze ababili bagalula.
“Abantwana akade bengangenanga emanzini bagijime bayabikela abadala abaphuthume bazozama ukusiza abantwana benelisa ukusiza abathathu kodwa ababili besebeziphelele ngaleso sikhathi.
“Okubuhlungu yikuthi unina womunye umntwana ongasekho kuzwakale ukuthi uke wakhuza umntanakhe ngokubhukutsha echibini lelo waze wacina emtshaya ngoba ebafice bebhukutsha labanye bakhe ngempelaviki edluleyo,” kutsho uNkkz Mutemi.
Esinye njalo isakhamuzi uMnumzana Tholana Ngwenya sithe abantu abagebha amagodi la kumele bazame ukuwavalela ngocingo ukuze abantwana bangangeni.
“Abagebha igodi leli bebesenzela ukufaka amatanka amafutha emota nanko phela kwakhiwa igalaji lamafutha emota kulindawo. Ngabe bayabiya indawo yabo kungabikhona umuntu ongenayo nxa besenza umsebenzi onje. Sibuhlungu ngokulahlekelwa ngabantwana kodwa sithanda ukucela labo abagebha amagodi ukuthi bafake ucingo kumbe ukuze izakhamizi ikakhulu abantwana bahlale bephephile,” kuphetha uMnu Ngwenya.
Isikhulumi samapholisa uInspector Abednico Ncube uthe udaba lolu bebengakalwamukeli ngesikhathi sokukhitshwa kwephephandaba.
